16.04.2026

Buxoro davlat universitetida Inson huquqlari bo‘yicha Milliy markaz ilmiy muvofiqlashtiruvchi kengashi hamda O‘zbekiston Respublikasida yuridik fanlarni rivojlantirish bo‘yicha muvofiqlashtiruvchi kengash raisi, akademik Akmal Saidov ishtirokida, shuningdek, Davlat va huquq instituti direktori Murodjon Turg‘unov qatnashuvida sayyor yig‘ilish o‘tkazildi.

Mazkur nufuzli tadbirning universitetda tashkil etilgani mamlakatimiz ilmiy va huquqiy hayotidagi muhim voqealardan biri bo‘ldi. Akademik Akmal Saidov rahbarligida o‘tkazilgan ushbu yig‘ilish yuridik fanlar sohasida nazariya va amaliyotni integratsiya qilish, hududlarda ilmiy salohiyatni rivojlantirish yo‘lidagi muhim strategik qadam sifatida e’tirof etildi.

Yig‘ilish doirasida asosiy e’tibor “O‘zbekiston – 2030” strategiyasining ustuvor yo‘nalishlariga, xususan, inson huquqlarini himoya qilishning konstitutsiyaviy asoslari hamda inson huquqlari sohasidagi Jahon ta’lim dasturining beshinchi bosqichini amalga oshirish masalalariga qaratildi.

Universitet ilmiy muhitida bo‘lib o‘tgan mazkur muloqotda insonning ta’lim olish huquqini xalqaro standartlar asosida ta’minlash, bu boradagi ilmiy tadqiqotlar sifatini oshirish yuzasidan muhim tavsiyalar ishlab chiqildi.

Poytaxtdagi yirik ilmiy markazlar hamda hududiy oliy ta’lim muassasalari o‘rtasidagi bunday yaqin hamkorlik yosh izlanuvchilar va doktorantlar uchun o‘z tadqiqotlarini xalqaro talablar darajasida shakllantirish hamda akademik doiralarda aprobatsiyadan o‘tkazish uchun muhim platforma bo‘lib xizmat qildi.

Yig‘ilish yakunlari bo‘yicha yuridik fanlarning dolzarb muammolari yuzasidan ilmiy asoslangan xulosalar chiqarilib, Buxoro viloyatida yuridik kadrlar tayyorlash va ilmiy maktablarni yanada mustahkamlash borasida yangi istiqbollar belgilab olindi.