10.09.2026

Bugun, 10-sentabr kuni Buxoro davlat universitetiga Pokistonning nufuzli Fanlar va texnologiyalar milliy universiteti (NUST) delegatsiyasi tashrif buyurdi.

Delegatsiyaga NUST rektori professor, doktor Muhammad Zahid Latif boshchilik qildi. Mehmonlarni Buxoro davlat universiteti rektori professor Obidjon Xamidov qabul qilib, universitet faoliyati, ta’lim va ilmiy salohiyati hamda xalqaro hamkorlik yo‘nalishlari yuzasidan muloqot olib bordi.

Uchrashuv davomida ikki universitet o‘rtasida ta’lim, ilm-fan va innovatsiyalar sohasidagi hamkorlikni yanada rivojlantirish, professor-o‘qituvchilar va talabalar almashinuvi, qo‘shma ilmiy loyihalarni amalga oshirish hamda istiqboldagi hamkorlik yo‘nalishlari muhokama qilindi.

Tashrif doirasida Pokiston Fanlar va texnologiyalar milliy universiteti delegatsiyasi BuxDU Registrator ofisi faoliyati bilan yaqindan tanishdi. Mehmonlarga talabalar uchun yaratilgan zamonaviy xizmatlar, ta’lim jarayonini tashkil etish va boshqarish tizimi haqida ma’lumot berildi.

Shuningdek, delegatsiya talabalar tomonidan tayyorlangan ko‘rgazmalar, ilmiy va ijodiy ishlanmalar bilan tanishib, universitetda amalga oshirilayotgan loyihalar hamda talaba-yoshlarning yutuqlariga alohida qiziqish bildirdi.

Tashrif davomida mehmonlarga Buxoro davlat universitetining bugungi faoliyati, xalqaro aloqalari, ilmiy-tadqiqot yo‘nalishlari va talabalar uchun yaratilgan imkoniyatlar keng tanishtirildi.

Mazkur tashrif BuxDU va Pokiston Fanlar va texnologiyalar milliy universiteti o‘rtasidagi akademik hamkorlikni yangi bosqichga olib chiqish, o‘zaro tajriba almashish hamda istiqboldagi qo‘shma tashabbuslarni amalga oshirish yo‘lidagi muhim qadam bo‘ldi.