15.08.2026

Buxoro davlat universitetida O‘zbekiston Respublikasi Fanlar akademiyasi rahbariyati va akademiklar ishtirokida ilm-fan va oliy ta’lim integratsiyasini yanada mustahkamlashga qaratilgan qator ilmiy-ma’rifiy tadbirlar tashkil etildi.

Buxoro davlat universitetiga O‘zbekiston Respublikasi Fanlar akademiyasi prezidenti, O‘zbekiston Qahramoni, fizika-matematika fanlari doktori, professor, akademik Shavkat Abdullayevich Ayupov, Fanlar akademiyasi vitse-prezidenti — bosh ilmiy kotib Shamansur Shaxsaidovich Sag‘dullayev, V.I. Romanovskiy nomidagi Matematika instituti direktor o‘rinbosari, fizika-matematika fanlari doktori, professor, akademik O‘tkir Abdullayevich Roziqov hamda boshqa akademiklar tashrif buyurdilar.

Nufuzli mehmonlarga Buxoro davlat universiteti rektori, professor Obidjon Hamidov hamrohlik qilib, universitetda amalga oshirilayotgan islohotlar, ta’lim va ilmiy-tadqiqot jarayonlari, professor-o‘qituvchilar va talabalar uchun yaratilgan sharoitlar, ilmiy-innovatsion loyihalar hamda istiqboldagi vazifalar haqida ma’lumot berdi.

Tashrif davomida akademiklar universitetning Ofis registratori, Faollar yig‘ingohi, shuningdek, BuxDU foyesida namoyish etilgan talabalar va yosh olimlarning ilmiy-ijodiy ishlari, innovatsion loyihalari va erishgan yutuqlari bilan yaqindan tanishdilar.

Mehmonlarga universitetda amalga oshirilayotgan keng ko‘lamli bunyodkorlik ishlari ham taqdim etildi. Xususan, yangi barpo etilayotgan BuxDU zamonaviy kampusi, uning konsepsiyasi, kelgusida talabalar va professor-o‘qituvchilar uchun yaratilishi ko‘zda tutilgan zamonaviy ta’lim, ilmiy-tadqiqot va ijtimoiy infratuzilma imkoniyatlari haqida batafsil ma’lumot berildi.

Akademiklar Matematika instituti Buxoro bo‘linmasi faoliyati bilan tanishdilar

Tashrifning muhim manzillaridan biri O‘zbekiston Respublikasi Fanlar akademiyasi V.I. Romanovskiy nomidagi Matematika instituti Buxoro bo‘linmasi bo‘ldi.

Buxoro davlat universiteti Differensial tenglamalar kafedrasi professori, V.I. Romanovskiy nomidagi Matematika instituti Buxoro bo‘linmasi boshlig‘i Durdimurod Durdiev mehmonlarga bo‘linmada olib borilayotgan fundamental va amaliy ilmiy tadqiqotlar, shakllangan ilmiy yo‘nalishlar, olimlar va yosh tadqiqotchilarning izlanishlari haqida ma’lumot berdi.

Muloqotda bo‘linmaning ilmiy salohiyatini yanada oshirish, ilmiy maktablarni rivojlantirish, yosh matematiklarni fundamental tadqiqotlarga keng jalb etish, shuningdek, akademik ilm-fan va universitet tadqiqotlari integratsiyasini kuchaytirish masalalariga alohida e’tibor qaratildi.

Tomonlar qo‘shma ilmiy tadqiqotlarni kengaytirish, istiqbolli ilmiy yo‘nalishlarni rivojlantirish va yosh olimlarni qo‘llab-quvvatlash borasida ham fikr almashdilar.

Zamonaviy ilmiy nashrlar taqdimoti

Tashrif doirasida zamonaviy iqtisodiyot, mehnat bozori va sun’iy intellektning dolzarb masalalariga bag‘ishlangan ilmiy nashrlar taqdimoti ham o‘tkazildi.

Jumladan, akademik K.X. Abdurahmonov tomonidan yaratilgan “Labor Economics in the Era of Artificial Intelligence” nomli ingliz tilidagi darslik taqdim etildi. Unda sun’iy intellekt davrida mehnat iqtisodiyoti va ijtimoiy-mehnat munosabatlarida yuz berayotgan o‘zgarishlar yoritilgan.

Shuningdek, akademik K.X. Abdurahmonov va professor N.Q. Zokirova tomonidan yaratilgan “Sun’iy intellekt davrida mehnat iqtisodiyoti” nomli darslik ham taqdim qilindi. Unda sun’iy intellekt va raqamli texnologiyalar ta’sirida mehnat bozorining transformatsiyasi, inson kapitalining yangi roli, bandlik shakllaridagi o‘zgarishlar, zamonaviy kasbiy kompetensiyalar hamda kelajak mehnat bozorida mutaxassislarga qo‘yiladigan yangi talablar ilmiy jihatdan yoritilgan.

Nashrlar taqdimoti sun’iy intellekt, inson kapitali, mehnat munosabatlari va kelajak mehnat bozori istiqbollari bo‘yicha ilmiy fikr almashish uchun muhim maydon bo‘ldi.

Tashrif yakunida Buxoro davlat universiteti rektori, professor Obidjon Hamidov O‘zbekiston Respublikasi Fanlar akademiyasi rahbariyati va akademiklarga universitetga tashrif hamda samarali ilmiy muloqot uchun minnatdorlik bildirdi. O‘zaro hurmat va ilmiy hamkorlik ramzi sifatida akademiklarga BuxDUning esdalik sovg‘alari topshirildi.

Mazkur tashrif O‘zbekiston Respublikasi Fanlar akademiyasi va Buxoro davlat universiteti o‘rtasidagi ilmiy hamkorlikni yanada mustahkamlash, akademik ilm-fan va oliy ta’lim integratsiyasini kuchaytirish, qo‘shma tadqiqotlarni rivojlantirish hamda yosh olimlarni ilmiy faoliyatga keng jalb etish yo‘lida muhim ahamiyat kasb etdi.

BuxDU Axborot xizmati