29.06.2026

Buxoro davlat universitetida Markaziy Osiyo sun’iy intellekt assosiatsiyasi raisi, taniqli davlat va jamoat arbobi Vladimir Norov ishtirokida «Sun’iy intellekt davrida oliy ta’lim va ilm-fan transformatsiyasi: Markaziy Osiyo tajribasi va Buxoro davlat universitetining istiqbollari» mavzusida ilmiy-amaliy uchrashuv bo‘lib o‘tdi. Tadbirda universitet rektori Obidjon Xamidov boshchiligidagi jamoa, professor-o‘qituvchilar va yosh tadqiqotchilar ishtirok etishdi.

Muloqot davomida oliy ta’lim jarayonlarini raqamlashtirish, sun’iy intellekt texnologiyalarini ilm-fanga keng integratsiya qilish va xalqaro tajriba almashishning dolzarb masalalari ko‘rib chiqildi. Uchrashuvning amaliy natijasi o‘laroq, Buxoro davlat universiteti hamda Markaziy Osiyo sun’iy intellekt assosiatsiyasi o‘rtasida o‘zaro hamkorlik memorandumi imzolandi. Mazkur hujjat universitetda innovasion loyihalarni amalga oshirish va raqamli ta’lim muhitini rivojlantirishda muhim huquqiy asos bo‘lib xizmat qiladi.

Tadbir doirasida BuxDU rektori Obidjon Xamidov Vladimir Norovning xalqaro miqyosdagi ulkan tajribasi hamda ilm-fan rivojiga qo‘shayotgan hissasini e’tirof etgan holda, unga «Buxoro davlat universiteti faxriy professori» unvoni hamda «BuxDU 95 yilligi» esdalik ko‘krak nishonini tantanali ravishda topshirdi. O‘z navbatida, universitet rektori Obidjon Xamidov mazkur hamkorlikning ahamiyatiga alohida to‘xtalib o‘tdi:

«Bugungi shiddatli globallashuv davrida sun’iy intellekt nafaqat texnologiya, balki ta’lim tizimini tubdan isloh qiluvchi asosiy drayverga aylandi. Vladimir Norov kabi xalqaro miqyosdagi ekspert va nufuzli bitiruvchilarimiz bilan o‘rnatilgan strategik sheriklik universitetimizning innovasion salohiyatini oshirish va yosh olimlarimizni dunyo ilm-fani bilan integratsiya qilishda yangi ufqlarni ochadi».

Samimiy muloqot davomida universitet tarixchi olimi Oybek Qilichov o‘zining diplomatiya tarixiga bag‘ishlangan ilmiy asarlarini mehmonga tuhfa etdi. Vladimir Norov o‘z ma’ruzasida Markaziy Osiyoda raqamli iqtisodiyot istiqbollari haqida to‘xtalib, BuxDUning bu boradagi salohiyatini yuqori baholadi.

BuxDU Axborot xizmati