27.06.2026

Buxoro davlat universitetida 2025/2026 o‘quv yili bitiruvchilariga bag‘ishlangan «Bitiruvchi–2026» tantanali diplom topshirish marosimi o‘tkazildi. Ushbu hayajonli lahzalarda yoshlarning quvonchiga sherik bo‘lish uchun viloyat hokimligi, OTM rektorlari, huquq-tartibot organlari va keng jamoatchilik vakillari jam bo‘lishdi.
 

Tadbirni Buxoro davlat universiteti rektori Obidjon Xamidov tabrik so‘zi bilan ochib berdi. Rektor o‘z nutqida universitetning xalqaro maydondagi muvaffaqiyatlari, xususan, THE xalqaro reytingida TOP-400 talikdan joy olganini alohida e’tirof etdi. Shuningdek, universitet rektori Buxoro viloyati hokimi Botir Zaripovning bitiruvchilarga yo‘llagan samimiy tabrigini o‘qib eshittirdi hamda yoshlarga mustaqil hayot yo‘lida zafarlar tiladi.

Tantanali marosimda Buxoro davlat tibbiyot instituti rektori Sh.Teshayev, Buxoro davlat pedagogika instituti rektori B.Ma’murov, Ombudsmanning mintaqaviy vakili A.Amanovna, O‘zbekiston Respublikasi Vazirlar Mahkamasi huzuridagi Xorijiy tillarni o‘rganishni ommalashtirish agentligi Buxoro viloyati vakilligi rahbari Nozima Xoliqova hamda «Muhammad Ismat» fermer xo‘jaligi rahbari Muhammad Ahmedov va boshqa mutasaddilar ishtirok etib, bitiruvchilarga diplomlarni topshirdilar.
 

Tadbirning badiiy qismida namoyish etilgan konsert dasturi, dilrabo kuy va qo‘shiqlar barchaga bayramona kayfiyat ulashdi. Bugun o‘z diplomlarini qabul qilib olgan minglab yoshlar Yangi O‘zbekiston taraqqiyotiga hissa qo‘shadigan yetuk mutaxassislar sifatida katta hayotga qadam qo‘ydilar.

BuxDU Axborot xizmati