08.06.2026

Buxoro davlat universiteti olimlari va iqtidorli yosh tadqiqotchilari tomonidan “Agrobiohimoya” laboratoriyasida yetishtirilgan foydali entomofaglar “Buxoro Varnet” MChJ korxonasi issiqxonalarida amaliyotga muvaffaqiyatli joriy etildi.
 

Mazkur laboratoriya to‘liq universitetning innovatsion jamg‘armasi mablag‘lari hisobidan moliyalashtirilgan bo‘lib, unda qishloq xo‘jaligi zararkunandalariga qarshi biologik kurashishning samarali texnologiyalari ustida ilmiy izlanishlar olib borilmoqda. Yosh olimlar tomonidan ko‘paytirilgan foydali hasharotlar (entomofaglar) o‘zaro tuzilgan xo‘jalik shartnomasi asosida sanoat usulidagi issiqxonalarda qo‘llanila boshlandi. Bu texnologiya zaharli kimyoviy vositalardan foydalanishni qisqartirish, agroekotizimni asrash va eksportbop, ekologik toza mahsulot yetishtirish imkonini beradi.
 

BuxDU rahbariyati va ilmiy jamoasi erishilgan ushbu natija asosida universitetning yangi ilmiy ishlanmalarini tijoratlashtirishga qaratilgan “Spin-off” korxonasini tashkil etishni rejalashtirmoqda. Bu kabi loyihalar ilm-fanni amaliyot bilan integratsiya qilish, intellektual mulk obyektlaridan daromad olish hamda agrar sohada zamonaviy startap ekotizimini rivojlantirishda muhim poydevor bo‘lib xizmat qiladi.

BuxDU Axborot xizmati