26.05.2026

Buxoro shahar “Toʻqimachilik” mahalla fuqarolar yigʻinida “2026-yilda Respublika mahallalarida jinoyatchilikning barvaqt profilaktikasi samaradorligini yanada oshirish boʻyicha tashkiliy chora-tadbirlar toʻgʻrisida” mavzusida oʻquv-seminar tashkil etildi.

Mazkur tadbirda Buxoro shahar “Toʻqimachilik” MFY raisi Sh. Jumayev, ijtimoiy xodim Z. Karimova, Buxoro davlat universiteti Yoshlarni maʼnaviy yuksalishga koʻmaklashish departamenti boshligʻi A. Avezov, profilaktika inspektori A. Gulyamov, Yoshlar ittifoqi yetakchisi M. Xomidov, “Qalqon” jamoasi aʼzolari D. Joʻrayev va Oʻ. Bozorov, amaliyotchi psixolog N. Musinova hamda universitet professori N. Joʻrayevalar ishtirok etdilar.

Seminar davomida mahallalarda jinoyatchilikning oldini olish, ayniqsa yoshlar oʻrtasida huquqbuzarliklar va turli salbiy holatlarning barvaqt profilaktikasini kuchaytirish, fuqarolarning huquqiy ongi hamda huquqiy madaniyatini yuksaltirish masalalari atroflicha muhokama qilindi.

Shuningdek, taʼlim muassasalari va mahalla hamkorligini yanada mustahkamlash, yoshlarning boʻsh vaqtlarini mazmunli tashkil etish, ularni yot gʻoyalar taʼsiridan himoya qilish, psixologik koʻmak tizimini rivojlantirish hamda profilaktik tadbirlarni samarali va tizimli yoʻlga qoʻyish boʻyicha taklif va tavsiyalar bildirildi.

Tadbir yakunida yoshlar tarbiyasi va jamiyat xavfsizligini taʼminlashda davlat tashkilotlari, mahalla va taʼlim muassasalari oʻrtasidagi hamkorlikni kuchaytirish muhim omillardan biri ekani alohida taʼkidlandi.