10.04.2026

Oliy ta’lim, fan va innovatsiyalar vaziri Qo‘ng‘irotboy Sharipov xizmat safari doirasida Buxoro davlat universitetiga tashrif buyurib, yoshlar uchun yaratilgan zamonaviy shart-sharoitlar, ta’lim jarayonlari hamda talabalar hayotini mazmunli tashkil etish borasidagi ishlar bilan tanishdi.

Tashrif davomida universitetda sportni rivojlantirish, sog‘lom turmush tarzini targ‘ib etish hamda talabalarning jismoniy faolligini oshirishga qaratilgan ishlar ko‘zdan kechirildi. Sport to‘garaklari faoliyati, mini futbol, basketbol, voleybol kabi sport turlari bo‘yicha yaratilgan infratuzilma hamda “Yangi O‘zbekiston talabalari olimpiadasi” doirasidagi jarayonlar bilan tanishildi.

Ta’kidlash joizki, BuxDU talabalari sport sohasida xalqaro va respublika miqyosida salmoqli yutuqlarga erishib kelmoqda. Xususan, universitet futbol jamoasi Pro ligaga yo‘llanma olib, ushbu nufuzli musobaqalarda munosib ishtirok etmoqda.

Shu bilan birga, oliy ta’lim muassasalarida sport yo‘nalishidagi talabalar jismoniy tayyorgarligi bilan bog‘liq masalalar muhokama qilinib, Buxoro davlat universitetida sport klublari faoliyatini takomillashtirish, talabalarni sportga keng jalb etish, federatsiyalar bilan hamkorlikni kuchaytirish hamda iqtidorli talabalar bilan manzilli ishlash tizimini yo‘lga qo‘yish bo‘yicha aniq chora-tadbirlar belgilab olindi.

Shuningdek, vazir talabalar turar joyidagi sharoitlar bilan tanishdi, Yoshlar ittifoqi boshlang‘ich tashkiloti huzuridagi “Qalqon” jamoatchilik guruhi a’zolari bilan muloqot o‘tkazdi. Imkoniyati cheklangan talabalar bilan uchrashuv davomida inklyuziv muhit va yaratilgan sharoitlar yuzasidan fikr-mulohazalar tinglandi.

Tashrif doirasida talabalar bo‘sh vaqtini mazmunli tashkil etish maqsadida o‘tkazilayotgan “Gulxan atrofida” madaniy dasturi hamda “Zakovat” intellektual o‘yini kuzatildi. Xorijlik talabalar bilan samimiy suhbat o‘tkazilib, ularning ta’lim jarayonidagi ishtiroki va yutuqlari e’tirof etildi.

Yakunda vazir universitetdagi coworking markazida volontyorlar klubi faoliyati bilan tanishib, yoshlarning ijtimoiy faolligini oshirishga qaratilgan tashabbuslar yuzasidan tegishli ko‘rsatmalar berdi.

Mazkur tashrif Buxoro davlat universitetida yoshlar uchun yaratilayotgan imkoniyatlar bilan birga, sport va jismoniy tarbiya yo‘nalishida olib borilayotgan ishlarni yangi bosqichga olib chiqish bo‘yicha muhim vazifalarni belgilab berdi.