08.04.2026

Buxoro davlat universitetida O‘zbekiston Respublikasi Oliy ta’lim, fan va innovatsiyalar vaziri o‘rinbosari O‘ktam Salomov ishtirokida qator muhim uchrashuv va tanishuv tadbirlari bo‘lib o‘tdi. Unda oliy ta’lim tizimini transformatsiya qilish, ilm-fan va innovatsiyalarni rivojlantirish, bitiruvchi talabalarni ish bilan ta’minlash hamda universitetda robototexnika yo‘nalishida amalga oshirilayotgan ishlar atroflicha muhokama qilindi.

Dastlab universitet rektori Obidjon Xamidov boshchiligida prorektorlar, bo‘lim va departament rahbarlari ishtirokida uchrashuv o‘tkazildi. Unda O‘zbekiston Respublikasi Prezidentining 2026-yil 4-apreldagi PF–54-son Farmoni mazmun-mohiyati yuzasidan batafsil tushuntirish berildi. Ta’kidlanganidek, mazkur farmon asosida oliy ta’lim va ilmiy muassasalarning innovatsion faoliyatini qo‘llab-quvvatlash, ilmiy ishlanmalarni tijoratlashtirish, texnologik transfer mexanizmlarini rivojlantirish hamda ularni ishlab chiqarishga joriy etish ustuvor vazifalar sifatida belgilangan.

Xususan, oliy ta’lim va ilmiy muassasalar muassisligida “spin-off” korxonalar tashkil etish, professor-o‘qituvchilar, talabalar va izlanuvchilarning ushbu jarayondagi faol ishtirokini ta’minlash, investorlarni jalb qilish, venchur moliyalashtirish va reinvestitsiya mexanizmlarini kengaytirish masalalariga alohida e’tibor qaratildi. Shuningdek, ilmiy ishlanmalar asosida yaratilgan mahsulotlar uchun soliq imtiyozlari joriy etilishi hamda tajriba-sinov ishlari xarajatlarining bir qismini davlat tomonidan qoplab berish tartibi yo‘lga qo‘yilishi qayd etildi.

Uchrashuvda oliy ta’lim tizimini transformatsiya qilishga qaratilgan ustuvor yo‘nalishlar ham ko‘rib chiqildi. Jumladan, “U10 – O‘zbekistonning ilg‘or universitetlari” dasturi doirasida yetakchi oliygohlarga milliy tadqiqot universiteti maqomini berish, ilmiy klasterlar tashkil etish, universitetlarni milliy reyting asosida rag‘batlantirish tizimini joriy etish, “Yangi O‘zbekiston stipendiyasi” dasturi orqali xorijiy talabalarni jalb etish hamda grant ajratishda mehnat bozori ehtiyojlarini inobatga olish masalalari muhokama markazida bo‘ldi.

Shuningdek, universitetda O‘zmilliybank AJ “Kelajakka qadam” markazi rahbariyati hamda bitiruvchi talabalar bilan alohida uchrashuv tashkil etildi. Tadbirda vazir o‘rinbosari O‘ktam Salomov O‘zbekiston Respublikasi Prezidentining PQ-61-son va PQ-328-son qarorlari mazmun-mohiyatiga to‘xtalib, bitiruvchi yoshlarni ish bilan ta’minlash, ularning bandligini oshirish va kasbiy faoliyatga yo‘naltirish bo‘yicha amalga oshirilayotgan chora-tadbirlar haqida ma’lumot berdi.

BuxDU rektori Obidjon Xamidov bitiruvchilarni ish bilan ta’minlash universitet faoliyatining ustuvor yo‘nalishlaridan biri ekanini ta’kidlab, bu borada tizimli ishlar olib borilayotganini qayd etdi. Uchrashuvda Buxorodagi davlat va nodavlat oliy ta’lim muassasalari vakillari ham studiya orqali ishtirok etdi.

Tadbir davomida O‘zmilliybank AJ “Kelajakka qadam” markazi mutaxassisi Shohzamon Jamshidovich loyiha imkoniyatlari, bitiruvchilar uchun yaratilayotgan sharoitlar va mavjud yo‘nalishlar haqida batafsil ma’lumot berdi. Shuningdek, markaz tomonidan bitiruvchi talabalarga kredit voucherlari topshirildi. “O‘zmilliybank” AJ Buxoro viloyat bosh boshqarmasi boshqaruvchisi Obid Shodiyev ham so‘zga chiqib, dastur mazmun-mohiyati, uning imkoniyatlari hamda bitiruvchi yoshlarni qo‘llab-quvvatlashdagi ahamiyati haqida fikr bildirdi. Mazkur uchrashuv bitiruvchilarni mehnat bozoriga samarali yo‘naltirish, ularning bandligini ta’minlash, tadbirkorlik tashabbuslarini qo‘llab-quvvatlash va kasbiy faoliyatiga amaliy ko‘mak berishda muhim ahamiyat kasb etdi.

Tashrif doirasida vazir o‘rinbosari universitetda robototexnika va innovatsion faoliyat yo‘nalishida amalga oshirilayotgan ishlar bilan ham yaqindan tanishdi. Universitet rektori hamrohligida BuxDU huzurida faoliyat yuritayotgan zamonaviy “RobotsAndMe” robototexnika o‘quv markazi faoliyati ko‘zdan kechirildi. Qayd etilganidek, mazkur markaz bugungi kunda nafaqat hududda, balki respublika miqyosida ilg‘or innovatsion maydon sifatida shakllanib bormoqda.

Markazdagi zamonaviy laboratoriya jihozlari, amaliy tajriba maydonlari hamda talabalar tomonidan ishlab chiqilgan innovatsion robot qurilmalari mehmonlarda katta taassurot qoldirdi. Eng muhimi, bu yerda faoliyat yuritayotgan iqtidorli talabalar va mutaxassislar xalqaro hamda jahon miqyosidagi robototexnika tanlovlari va musobaqalar sovrindorlari ekani alohida e’tirof etildi.

O‘ktam Salomov yoshlarning muhandislik tafakkuri, kreativ yondashuvi va texnologik salohiyatini yuqori baholab, BuxDUda robototexnika yo‘nalishida yaratilgan muhitni namunali tajriba sifatida qayd etdi. Shu bilan birga, markaz faoliyatini yanada rivojlantirish, startap loyihalarni qo‘llab-quvvatlash hamda ishlanmalarni tijoratlashtirish bo‘yicha muhim tavsiyalar berdi.

Yakunda ilm-fan sohasi va oliy ta’limni transformatsiya qilish, bitiruvchilar bandligini ta’minlash, innovatsion tashabbuslarni qo‘llab-quvvatlash hamda robototexnika yo‘nalishidagi ilg‘or tajribalarni kengaytirish bo‘yicha ustuvor vazifalar belgilab olindi. Mazkur tadbirlar Buxoro davlat universitetida zamonaviy ta’lim, ilmiy izlanish, innovatsiya va amaliy hamkorlikni yangi bosqichga olib chiqishga xizmat qilmoqda.