BuxDUda rahbariyat vakillarining Talabalar turar joyida qolishi, talaba-yoshlar bilan ular qiziqqan mashg'ulotlar doirasida qizg'in suhbat qurishi odat tusiga kirgan.
Buxoro davlat universiteti rektori, professor Obidjon Xamidov talabalar turar joyida bo'lib, talabalar yashash sharoitlari, qiziqishlari bilan toʻliq tanishdi. Yoshlar bilan suhbat jarayonida ularning qiziqishlari, xobbilari, sogʻliqlari, oʻqish va yashash tarzi borasidagi masalalarni oʻrgandi.
Shu kecha TTJdagi imkoniyati cheklangan BuxDU talaba-yoshlari bir nuqtaga jamlandi. Boisi, ular uchun rektor tashabbusi bilan shaxmat, shashka, stol tennisi kabi sport musobaqalari, Zakovat intellektual o'yini tashkil etildi. Bu musobaqalarda muassasa rahbarining shaxsan ishtirok etishi imkoniyati cheklangan talaba-yoshlarga zavq va ishonch bag'ishladi. Rektor Obidjon Xamidov har bir talabaning sevib o'qigan asari xususida mulohazalarini tingladi. Fikr bildirish asnosida kelajakda yetuk kadr bo'lish uchun qilinishi kerak tadbirlarni o'rtoqlashdi. Talabalar turar joyidagi kompyuter markazida axborot texnologiyalari bilan qay darajada mashg'ul ekanliklarini o'rgandi. Ijodkor talabalar kuylagan kuy-qoʼshiqlar tadbirga yanada fayz bagʼishladi. Shaxmat musobaqasida munosib ishtirok etgan hamda Zakovat intellektual o'yinida g'alaba qozongan talaba-yoshlar tashakkurnomalar bilan taqdirlanishdi.
BuxDU rektori Obidjon Xamidov tomonidan talabalar turar joyida istiqomat qiluvchi talabalar uchun iftorlik dasturxoni yozildi.
Rektor tomonidan TTJda o'tkazilgan fayzli kun talabalar hayotidagi unutilmas kun sifatida muhrlanib qoldi, desak aslo mubolag'a emas.
Buxoro davlat universiteti Matbuot xizmati
