04.05.2026

                                                                  Toza havo uchun barchamiz mas’ulmiz.

                                                                                                             "Toza havo – inson salomatligining eng buyuk boyligidir".

                                                                                                                                                                                (Gippokrat)            

       Texnika va texnologiya, sanoat yuqori darajada rivojlangan bugungi kunda atrof-muhitni muhofaza qilish muhim ahamiyat kasb etadi. Zaminimiz inson faoliyati natijasida turli ekologik muammolarga duch kelmoqda. Tibbiyotning otasi bo'lmish Ibn Sino: "Agar havoda chang va g'ubor bo'lmasa edi, inson yana ming yillar yashagan bo'lardi", – deb bejiz aytmagan. Chunki inson salomatligi va tabiat barqarorligi uchun toza havoning ahamiyati beqiyos.Toza havo nafaqat nafas olish jarayonini yengillashtiradi, balki organizmning barcha a'zolari faoliyatini me'yorida ishlashiga yordam beradi. Shuning uchun toza havo sog'lom hayotning garovidir. Havoning ifloslanishi esa turli kasalliklarni keltirib chiqarmoqda, masalan, nafas yo'llari xastaliklari, astma, allergiya, yurak qon tomir muammolari ko'paymoqda. Qishloq xo'jaligi, sanoat, korxona va transport faoliyatlari tabiat buzilishiga sababchidir. Ayniqsa, poytaxtimiz Toshkent shahrining "eng iflos va eng chang shahar" nomini olishi ham inson omili natijasidir. Toshkent shahrining ifloslanishi – jiddiy ekologik muammo bo'lib, uni hal qilish uchun har bir fuqarodan tortib davlat tashkilotlarigacha ma'suliyatli yondashuv talab etiladi. Bizning har bitta arzimas ishimiz, birlashgan sa'y-harakatlarimiz orqali shaharni toza va musaffo qilishga yordam berishi mumkin. "Tomchi-tomchi yig'ilib ko'l bo'lur, qatra-qatra yig'ilib daryo bo'lur" deganlaridek, bizning hozir yerda yotgan axlatni olishimiz, daraxt ko'chatlarini ekishimiz kabi arzimas deb bilgan ishimiz ertaga tabiatni asrab qolishi mumkin.

      Inson omili natijasida, Yer shari zararlanib bormoqda. Shuning uchun tabiat muhofazasini davlat siyosati darajasiga ko'tarilganligi aniq yechimlarni berishi mumkin. Turli xil ofatlar va suv tanqisligi, ozon qatlamining yemirilishi Ona Yerga ziyon yetkazishi mumkin. Ishlab chiqarish korxonalariga filtr o'rnatish, transport vositalaridan kamroq foydalanish, toza suvni tejash, o'rmonlarni ko'paytirib, yangi daraxt ko‘chatlarini ekish kabi oddiy qadamlar orqali Yer sharidagi toza havoni asrash mumkin. Teodor Ruzvelt: "Agar tabiatni asramasak, kelajak bizni kechirmaydi" deganidek, bizga tabiat in'om etgan ne'matlarni qadrlamay, ularga nisbatan ko'r-ko'rona munosabatda bo'lsak, kelgusi avlod bizni aslo kechirmaydi.

        Tabiat bu bizniki emas, biz unga kelib-ketguvchilarmiz, shunday ekan, uni sof, toza, asl holida kelajak avlodga yetkazaylik. Ona sayyoramizning barcha uchun birdek azizligini unutmaylik. Uni asrab-avaylashni esa muqaddas burchimiz deb bilaylik. Bugun qilgan arzimas ezgu amallarimiz tabiatni asrab, insoniyat uchun katta najot bo'lishi mumkin.  Azizlar, unutmang, toza havo uchun barchamiz birdek mas'ulmiz!

                                                                                                                                                    Hasanova Shahinabonu Jamshid qizi

                                                                                                         Filologiya va tillarni o'qitish (o'zbek tili) 6-4Uzb-25 guruh talabasi