#Tonggi_shabnam
#Talabalar_ijodidan
#Filologiya_fakulteti
SHUNCHAKI...
Men shunchaki o‘ylagim kelmas,
Xayol – sarob misol qilsin sarxush, mast.
Men shunchaki kuylagim kelmas,
Ovoz pardalarim chidab bersa bas.
Qo‘lingga tusharkan jajji chaqaloq,
Shunchaki sevmoqda qanday lazzat bor.
Kerak chinqirtirib o‘pib, tishlamoq,
Biz ham go‘daklikda topganmiz ozor.
Shunchaki sevilmoq – baxti qoralik,
To‘la tole uchun bu kemtik, bu kam.
Mening qalbim shunday sevgiga molik,
Bir charsillab yonay, so‘ngra so‘nsam ham.
Ohangga shunchaki solmasdan quloq,
Tarjima qilib yoz sim sadolarin.
Axir buloqmasmish tog‘dagi buloq,
Ko‘z yoshlarimish u ishq gudolarin.
Shunchaki kulmoq ham istehzodek gap,
Birdan qah-qah uray, cho‘chib ketsinlar.
Boshlariga osmon tushganday qulab,
Gʻaflat bandalari yoqa tutsinlar.
✍️Halima Xudoyberdiyeva
