12.09.2026

Buxoro davlat universiteti Sport va san'at fakultetida “Talabalikka bag‘ishlov” tantanasi

O‘zbekiston Respublikasi davlat mustaqilligining 35 yilligi hamda yangi 2026/2027-o‘quv yilining boshlanishi munosabati bilan Sport va san'at fakultetida “Yagona Vatan, yagona xalq bo‘lib, yangi hayot va kelajak yaratamiz!” shiori ostida yangi talabalar uchun “Talabalikka bag‘ishlov” marosimi tashkil etildi.

“Talabalikka bag‘ishlov” — bu shunchaki yangi o‘quv yilining boshlanishi emas, balki minglab yoshlarning hayotida yangi bosqich, yangi imkoniyatlar va ulkan orzular sari qo‘yilgan muhim qadamdir.

Tantanali marosimni BuxDU Sport va san'at fakulteti dekani Sattorov Anvar Ergashovich ochib berib, yangi talabalik baxtiga muyassar bo‘lgan yoshlarni samimiy muborakbod etdi. Dekan o‘z so‘zida talabalik davri inson hayotidagi eng mas’uliyatli va unutilmas davrlardan biri ekanini ta’kidlab, yoshlarni puxta bilim olishga, izlanishga, Vatanga sadoqatli, xalq manfaatiga xizmat qiladigan yetuk mutaxassislar bo‘lib kamol topishga chorladi hamda ularga kelgusi o‘qishlarida ulkan muvaffaqiyatlar tiladi.

Shuningdek, tadbirda Kafedra mudirlari, dekan o'rinbosarlari, professor-o'qituvchilar va faxrli mehmonlar so‘zga chiqib, yoshlarni yangi hayot bosqichiga qadam qo‘yganlari bilan tabrikladi.

Ular o‘z nutqlarida bugungi yoshlar uchun yaratilayotgan keng imkoniyatlar, zamonaviy ta’lim va bilim olish uchun mavjud sharoitlar haqida so‘z yuritib, talabalik yillarini mazmunli va samarali o‘tkazish, ustozlardan bilim olish, Vatan ravnaqi va jamiyat taraqqiyotiga munosib hissa qo‘shish muhimligini alohida qayd etdilar.

Bugun universitetimiz ostonasidan talaba sifatida kirib kelgan har bir yoshning oldida yangi imkoniyatlar eshigi ochildi. Endilikda ular nafaqat bilim oluvchi, balki Buxoro davlat universitetining sha’ni, nufuzi va kelajagini yuksaltiruvchi yosh avlod vakillaridir.

Aziz talabalar! Talabalik maqomingiz muborak bo‘lsin!