Kafedra tarixi va shakllanishi

1974-yil 30-sentabrda institut rektori professor J.Namozovning buyrug‘i bilan Rasm va chizmachilik bo‘limi negizida Badiiy grafika fakulteti tashkil topdi. Fakultet dekani hamda yagona “Chizmachilik va rasm” kafedrasi mudiri etib J.Yodgorov tayinlandi. 1975-yilda kafedra ikkiga ajralib, “Chizma geometriya va chizmachilik” (rahbari J.Yodgorov) hamda “Tasviriy san’at, chizma geometriya va chizmachilik” (rahbari S.Raupov) kafedralari sifatida o‘z faoliyatini davom ettirdi.

Kafedra keyingi davrlarda turli fakultetlar tarkibida faoliyat olib bordi: 2015-yil 11-maydan Pedagogika fakultetida, 2016-yildan Turizm fakultetida, 2019-yildan esa San’atshunoslik fakultetida “Tasviriy san’at va muhandislik grafikasi” kafedrasi sifatida yuritildi. 2024-yilda San’atshunoslik va pedagogika fakultetida “Tasviriy va amaliy san’at” nomi bilan qayta tashkil qilindi. 2026-yilda esa Sport va san’at fakulteti tashkil etilishi munosabati bilan Musiqa kafedrasi bilan birlashtirilib, “Tasviriy san’at va musiqa ijrochiligi” kafedrasiga aylantirildi.

Ilmiy salohiyat va an'analar

Hozirgi paytda kafedrada 26 nafar professor-o‘qituvchi faoliyat ko‘rsatmoqda. Shulardan 2 nafari fan doktori (DSc), professorlar (S.S.Azimov, T.I.Rajabov), 2 nafari fan nomzodi, professorlar (D.Yu.Ro‘ziyev, B.I.Mustafayev), 1 nafari falsafa doktori (PhD), dotsent (G.R.Ostonova), 7 nafari dotsent, 5 nafari katta o‘qituvchi va 8 nafari o‘qituvchilardir.

Kafedrada "Ustoz-shogird" an’anasi tizimli yo‘lga qo‘yilgan. Professor-o‘qituvchilar rahbarligida talabalar xalqaro va respublika miqyosidagi ko‘rgazma hamda ijodiy tanlovlarda faxrli o‘rinlarni egallab kelmoqdalar. Bugungi kungacha kafedrani 3 500 dan ortiq mutaxassis tamomlab, xalq xo‘jaligining turli tarmoqlarida faoliyat yuritmoqda.