10.04.2026

Oliy ta’lim, fan va innovatsiyalar vazirining birinchi o‘rinbosari Sardor Rajabov xizmat safari doirasida Buxoro davlat universitetida bo‘lib, ta’lim jarayonini takomillashtirish, zamonaviy infratuzilmani rivojlantirish hamda talabalar uchun yaratilayotgan sharoitlar bilan yaqindan tanishdi.

Tashrif davomida universitetning Tarix fakulteti, shuningdek, yangidan barpo etilgan 2700 o‘rinli zamonaviy o‘quv binosi ko‘zdan kechirildi. Universitet rektori hamda tegishli yo‘nalishlar bo‘yicha mas’ullar tomonidan amalga oshirilgan ishlar, ta’lim jarayonini samarali tashkil etish uchun yaratilgan imkoniyatlar va istiqboldagi rejalar yuzasidan batafsil ma’lumot berildi.

2026/2027-o‘quv yilida Buxoro davlat universiteti bakalavriatining 71 ta ta’lim yo‘nalishiga 4 432 nafar yosh o‘qishga tavsiya etilgan bo‘lib, ularning 1 017 nafari davlat granti asosida tahsil olish imkoniyatiga ega bo‘ldi. Shuningdek, 190 nafar abituriyent maksimal 189 ball bilan universitetni tanlagan, 23 nafar yosh esa SAT sertifikati asosida qo‘shimcha davlat grantiga tavsiya etilgan.

Universitetning o‘z mablag‘lari hisobidan 86,5 milliard so‘m yo‘naltirilib, 2700 o‘rinli yangi o‘quv binosi, Axborot-resurs markazi hamda 400 o‘rinli talabalar turar joyini o‘z ichiga olgan zamonaviy majmua barpo etildi.

Yangi o‘quv binosida Iqtisodiyot va turizm, Davlat auditi, Xorijiy tillar hamda Yurisprudensiya fakultetlari faoliyat yuritmoqda. Binodagi zamonaviy auditoriyalar, IT laboratoriyalar, ilmiy-innovatsion maydonlar va boshqa infratuzilma obyektlari talabalar hamda professor-o‘qituvchilar uchun qulay va samarali ta’lim muhitini yaratishga xizmat qilmoqda.

Tashrif chog‘ida mavjud infratuzilmadan samarali foydalanish, ta’lim va ilmiy faoliyat integratsiyasini kuchaytirish, talabalar va professor-o‘qituvchilar uchun yaratilgan sharoitlarni yanada yaxshilash masalalariga ham alohida e’tibor qaratildi. Shuningdek, mazkur yo‘nalishlarni kelgusida yanada rivojlantirish bo‘yicha belgilangan istiqbolli rejalar haqida ma’lumot taqdim etildi.

Buxoro davlat universitetining istiqboldagi taraqqiyotiga qaratilgan yana bir yirik loyiha — 30,2 gektar hududda bunyod etilayotgan yangi zamonaviy kampusdir. Mazkur kampus tarkibida 20 ming o‘rinli o‘quv binolari hamda 5 400 o‘rinli talabalar turar joylari barpo etilmoqda.

Ushbu yirik loyihalar universitetning ta’lim va ilmiy salohiyatini yanada kengaytirish, talabalar va professor-o‘qituvchilar uchun zamonaviy akademik muhit yaratish, ilmiy-innovatsion faoliyatni rivojlantirish hamda Buxoroning mamlakatimizdagi yirik ta’lim va ilm-fan markazlaridan biri sifatidagi nufuzini yanada mustahkamlashga xizmat qiladi.

Buxoro davlat universiteti Axborot xizmati