11.09.2026

Ijtimoiy tarmoqlar va ayrim axborot manbalarida “Universitetlarni shahar markazidan haydash va talabalar yotoqxonalarini sotish davom etadi” mazmunidagi sarlavha ostida Buxoro davlat universitetining mavjud bino va inshootlari auksion savdolariga chiqarilishi yuzasidan turli talqinlar tarqalmoqda.

Mazkur xabarlar yuzasidan Buxoro davlat universiteti Axborot xizmati quyidagilarni ma’lum qiladi.

O‘zbekiston Respublikasi Bosh vaziri rahbarligida 2026-yil 19-fevral kuni o‘tkazilgan sayyor majlisning 34-son bayoni 16-bandiga muvofiq, Buxoro davlat universitetining mavjud barcha bino va inshootlarini joriy yilning 15-avgustiga qadar bo‘shatib berish sharti bilan ularni belgilangan tartibda auksion savdolariga chiqarishni tashkil etish vazifasi belgilangan.

30,2 gektar maydonda Buxoro davlat universitetining yangi, zamonaviy kampusi barpo etilmoqda. Loyiha doirasida 20 ming nafar talabaga mo‘ljallangan 7 ta zamonaviy o‘quv binosi, shuningdek, jami 5 400 o‘rinli 9 ta talabalar turar joyi qurilishi ko‘zda tutilgan.

Yangi kampus faqat o‘quv va yashash binolaridan iborat bo‘lmaydi. Hududda zamonaviy stadion, sport zali, amfiteatr, kutubxona, avtoturargohlar, dam olish va ochiq sport maydonlari ham barpo etiladi.

Keng ko‘lamli ushbu loyiha natijasida Buxoro davlat universiteti bugungi infratuzilmasidan ham ancha keng, qulay va zamonaviy ta’lim muhitiga ega bo‘ladi. Yangi kampus talabalarning ta’lim olishi, yashashi, sport bilan shug‘ullanishi va bo‘sh vaqtini mazmunli o‘tkazishi uchun barcha imkoniyatlarni bir hududda jamlaydi.

Shu bois, universitetning mavjud bino va inshootlari bilan bog‘liq amalga oshirilayotgan ishlarni “universitetni shahar markazidan haydash” yoki “talabalar yotoqxonalarini sotish” tarzida talqin qilish jarayonning mazmuni va huquqiy asoslarini aks ettirmaydi.

Buxoro davlat universiteti jamoatchilik va ommaviy axborot vositalarini mazkur masalaga doir xabarlarni yoritishda rasmiy hujjatlar, vakolatli tashkilotlar ma’lumotlari hamda jarayonning huquqiy asoslariga tayanishga chaqiradi.

Buxoro davlat universiteti Axborot xizmati