21.05.2026

Bugun, 21-may kuni Buxoro davlat universitetida 2025/2026-o‘quv yilida fan olimpiadalari, xalqaro va respublika miqyosidagi tanlovlar hamda ma’naviy-ma’rifiy loyihalarda yuqori natijalarga erishgan yoshlarni tantanali taqdirlash marosimi o'tkazilmoqda. Tadbir tashkilotchilari: Talabalarning ilmiy tadqidot faoliyatini tashkil etish sektori hamda klub va to'garaklar faoliyatini muvofiqlashtirish sektori. Tadbirni universitetning Ilmiy ishlar va innovatsiyalar bo‘yicha prorektori Kamoliddin Samiyev ochib berib, universitetda ilm-fan va iqtidorli yoshlarni qo‘llab-quvvatlash borasidagi islohotlar samarasiga to‘xtaldi.

Marosimda xalqaro maydonda yurtimiz bayrog‘ini baland ko‘targan talabalar alohida e’tirof etildi. Xususan, Rossiyaning Sankt-Peterburg shahrida o‘tgan matematika olimpiadasi, Turkmanistonning nufuzli oliygohlari (Xalqaro otchilik akademiyasi, Turkman davlat pedagogika instituti, Xalqaro neft va gaz universiteti hamda Turkman davlat tibbiyot universiteti) mezbonlik qilgan iqtisodiyot, fizika, informatika va biologiya fan olimpiadalari g‘oliblariga yuksak ehtirom ko‘rsatildi. Shuningdek, 2026/2027-o‘quv yili qabuli uchun 11-sinf o‘quvchilari o‘rtasida o‘tkazilgan BuxDU fan olimpiadalari g‘oliblari ham munosib taqdirlandilar.

Tadbir davomida ma’naviy-ma’rifiy yo‘nalishdagi loyihalar — “Yoshlar giyohvandlikka qarshi!”, “Jadidlar jasorati — millatimiz faxri”, “Amir Temur davlatchiligi saboqlari” mavzusidagi insholar, videolar va plakatlar tanlovi g‘oliblariga diplomlar topshirildi. “Kelajak muhandislari”, “Sharq gavhari” xalqaro festivallari hamda “Mirzo Ulug‘bek vorislari” tanlovi g‘oliblari qatorida, universitetning eng sara talabalarini birlashtirgan “Oltin fond” a’zolari ham tantanali ravishda e’tirof etildi. Mazkur tadbir Buxoro davlat universiteti jamoasining intellektual salohiyatini namoyish etib, yoshlarni yangi marralar sari ilhomlantirishga xizmat qildi.