10.06.2026

Buxoro davlat universiteti Bandlik va karyera bo‘limi hamda "O‘zmilliybank" AJ hamkorligida amalga oshirilayotgan "Kelajakka qadam" dasturi doirasida bitiruvchi yoshlar tomonidan yo‘lga qo‘yilgan tadbirkorlik loyihalari ko‘zdan kechirildi.

Xususan, universitet bitiruvchisi Akobirxo‘ja Xudoyberdiyev tomonidan polipropilen qoplar ishlab chiqarish yo‘nalishida tashkil etilgan korxona faoliyati o‘rganildi. Yosh tadbirkor bankning 1 milliard 800 million so‘m miqdoridagi imtiyozli kredit mablag‘ini muvaffaqiyatli o‘zlashtirib, zamonaviy ishlab chiqarish liniyasini ishga tushirdi. Ayni damda korxonada mahsulot tayyorlash jarayonlari to‘liq yo‘lga qo‘yilgan bo‘lib, bu orqali hududda yangi ish o‘rinlari yaratilishiga erishildi.

Mazkur tashabbus BuxDUda tahsil olayotgan talabalarning nafaqat nazariy bilim olishi, balki bitiruv arafasida o‘z biznes g‘oyalarini moliyalashtirish va real iqtisodiyotga kirib borishiga xizmat qilmoqda. Imtiyozli kreditlardan samarali foydalanayotgan yosh mutaxassislar o‘z tadbirkorlik faoliyatini kengaytirish orqali mamlakatimiz eksport salohiyatini oshirishga va iqtisodiy barqarorlikni ta’minlashga munosib hissa qo‘shmoqdalar. Universitet ma’muriyati tomonidan bitiruvchilarning bandligini ta’minlash va ularni tadbirkorlikka yo‘naltirish borasidagi bunday monitoring ishlari tizimli davom ettirilmoqda.