Toshkent shahrida Texnologiyalar va innovatsiyalarni qo‘llab-quvvatlash markazlarining IV Milliy anjumani bo‘lib o‘tdi. Mazkur anjuman O‘zbekiston Respublikasi Adliya vazirligi huzuridagi “Intellektual mulk markazi” tashabbusi bilan tashkil etilib, mamlakatimizning yetakchi oliy ta’lim muassasalari, ilmiy tashkilotlari hamda innovatsion markazlari vakillarini birlashtirdi.
Tadbir davomida texnologik rivojlanish, patentlash jarayonlari, intellektual mulkni boshqarish, patent axborot tizimlari, yoshlar orasida innovatsion tafakkurni kengaytirish kabi dolzarb masalalar yuzasidan ma’ruzalar tinglandi va muhokamalar olib borildi.
Anjuman ishida Buxoro davlat universitetidan Ilmiy tadqiqotlar va innovatsiyalar departamenti bosh mutaxassisi N.I. G‘aybullayeva, shuningdek, BuxDu dotsenti N. Nazarova faol ishtirok etib, intellektual mulk sohasidagi ilmiy-amaliy jarayonlarni takomillashtirish, innovatsion g‘oyalarni tijoratlashtirish hamda TIQQMlar faoliyatini rivojlantirishga doir taklif va mulohazalar bildirdilar. Ularning ishtiroki anjuman doirasida Buxoro davlat universitetining ushbu yo‘nalishdagi ilmiy salohiyati va tajribasini namoyish etish, shuningdek, kelgusidagi hamkorlik loyihalarini kengaytirishga xizmat qildi.
Tadbir yakunida eng faol TIQQMlar taqdirlandi, shuningdek, Milliy anjuman yakunlari bo‘yicha tegishli hujjat qabul qilindi.
