21-aprel kuni Birlashgan Arab Amirliklari poytaxti Abu Dabi shahrida joylashgan Anvar Gargash nomidagi diplomatik akademiyasida Buxoro davlat universiteti, O‘zbekistonning BAAdagi elchixonasi, O‘zbekiston madaniyat va san’atni rivojlantirish jamg‘armasi hamkorligida 2025-yilda UNESCO Bosh konferensiyasining 43-sessiyasi Samarqand shahrida o‘tkazilishi munosabati bilan targ’ibot tadbiri bo‘lib o‘tdi.
Tadbirda turli xalqaro tashkilotlar, elchixonalar, olimlar, aqliy markazlar vakillari, BAAda istiqomat qilayotgan vatandoshlar, talabalar, shu jumladan “El-yurt umidi” jamg‘armasi stipendiantlari ishtirok etishdi.
Tadbir A.Gargash nomidagi diplomatik akademiya rahbari N.Mladenov hamda O‘zbekistonning BAAdagi favqulodda va muxtor elchisi A.Akkulovlarning tabrik so‘zi bilan boshlandi.
Plenar sessiyada so‘zga chiqqan O‘zbekiston madaniyat va san’atni rivojlantirish jamg‘armasi maslahatchisi C.Zammit, Buxoro davlat universiteti rektori O.Xamidov, prorektor A.Jo‘rayevlar UNESCO faoliyati doirasida O‘zbekistonning tashabbuslari, mamlakatimizda ta’lim, madaniyat va san’at sohalarida olib borilayotgan islohotlar, 2025-yil davomida mamlakatimizda o‘tkazilishi rejalashtirilgan yirik tadbirlar to‘g‘risida ma’lumot berib o‘tishdi.
Tadbir doirasida san’atkorlar chiqishi, milliy folklor namunalari namoyishi, turizm salohiyatini targ‘ib qilishga qaratilgan tadbirlar ham o‘tkazildi. Shuningdek, BAA OTMlarida ta’lim olayotgan yoshlar bilan uchrashuvlar tashkil etildi.
