Joriy yilning 27-yanvar kuni BuxDU kichik majlislar zalida rektor va olimlar uchrashuvi boʻlib oʻtdi. Buxoro davlat universiteti rektori O.Xamidov universitetda faoliyat olib borayotgan fan doktori, professorlar bilan uchrashuv o‘tkazib, 22-yanvar kuni Oliy taʼlim, fan va innovatsiyalar vazirining davlatimiz rahbariga sohadagi ustuvor vazifalarga oid taqdimoti hamda 2025-yilda tizimda amalga oshiriladigan vazifalar haqida axborot berdi.
Uchrashuv davomida universitetning yetakchi olimlar davlatimiz rahbari tomonidan 2025-yilda oliy ta’lim va fan sohasini rivojlantirish bo‘yicha belgilangan vazifalar, oliy taʼlim tizimiga xorijiy investitsiyalarni jalb qilish, taʼlim eksportini yoʻlga qoʻyish boʻyicha berilgan topshiriqlar, uning ijro mexanizmi xususida berilgan koʻrsatma va tavsiyalar bilan tanishtirildi.
Shundan so‘ng universitetni 2025-yilda kompleks rivojlantirish bo‘yicha ishlab chiqilgan chora-tadbirlar dasturi hamda uni amalga oshirishda olimlarning faol ishtiroki bo‘yicha muhokamalar olib borildi. So‘zga chiqqan olimlar xorijiy investiyalarni jalb qilish, ilmiy-innovatsion ishlanmalarni tijoratlashtirish, Scopus xalqaro ma’lumotlar bazalarida indekslanadigan jurnallarda ilmiy maqolalar nashr qilish, davlat ilmiy-texnik dasturlari doirasidagi fundamental, amaliy, innovatsion va startap loyihalar tanlovlarida ishtirok etish bo‘yicha bir qator tashabbuslarni ilgari surdilar.