Buxoro davlat universitetida 2024/2025 o‘quv yili davomida 8 ta fakultet tarkibida 34 ta kafedra faoliyat ko‘rsatadi. 85 ta bakalavriat ta’lim yo‘nalishida 20537 nafar talaba 1067 ta akademik guruhda tahsil olmoqda. Magistratura esa 34 ta mutaxassislikni qamrab oladi.
Yoshlarning muammolarini hal etish, yashash va ta’lim jarayonlarini yanada yaxshilash maqsadida belgilangan jadval asosida talabalarning barchasi bilan Rektor va yoshlar uchrashuvi tashkil etilmoqda.
21-yanvar kuni, Buxoro davlat universiteti katta majlislar zalida universitet rektori O.X.Xamidov hamda fizika-matematika va axborot texnologiyalari fakultetining talaba-yoshlari uchrashuvi boʻlib oʻtdi. Uchrashuvda universitet va fakultet rahbariyati, fakultet pedagog-xodimlari, tyutorlar hamda 400 ga yaqin talaba-yoshlar ishtirok etishdi.
"Davlatimiz rahbari tomonidan aniq fanlar hamda texnologiya yoʼnalishiga kundan kunga eʼtibor qaratilmoqda, ushbu sohada istiqbolli islohotlar qamrovi kengaytirilmoqda. Shu bilan bir qatorda, soha rivojini ta'minlash maqsadida turli loyihalar va dasturlar ishlab chiqilmoqda. Talaba-yoshlar yaratilayotgan ushbu imkoniyatlardan samarali foydalanishlari, bugungi shiddat bilan rivojlanayotgan zamonda kerakli yo'nalishdagi kerakli kadr bo'lib yetishishlari lozim.
Dunyo ilm ahliga yetuk olimlarni yetishtirib bergan Buxoroyi sharifda tahsil olish ulkan imkoniyatlar eshigini ochadi, albatta. Har bir soha bo'yicha: san'at, sport, fan borasida universitetimizda bugungi kunda yaratilayotgan sharoitlar mislsizdir. Umid qilamizki, siz, yoshlar, ota-onangiz hamda vatanimiz oldidagi burchingizni bajarib, ishonchimizni oqlaysiz", - deydi Buxoro davlat universiteti rektori, iqtisodiyot fanlari doktori, professor O.X.Xamidov.
Uchrashuv davomida talabalarning fikr-mulohazalari, takliflari tinglandi hamda savollarga javob berildi. Jumladan, bir qator xalqaro va respublika musobaqalari sovrindori Safarov Rustambek kelgusida o'tkaziladigan xalqaro olimpiadalarda ishtirok etish uchun amaliy yordam so'radi. Universitet rektori tomonidan ushbu taklif qo'llab-quvvatlandi hamda mas'ullarga tegishli topshiriqlar berildi.
Shuningdek, uchrashuv davomida IELTS sertifikatidan yuqori ballni qo'lga kiritgan talabalar ham so'zga chiqishdi. Ulardan biri Erdonov Ahror ingliz tilini bilish tuganmas ma'lumotlar bazasini ochishini aytdi. Yana biri Nurmuhammad, u yosh bo'lsa-da, erishgan yutuqlari havas qilarli. Jumladan, shaxmat bo'yicha Respublikada faxrli o'rinni egallagan, shu bilan birga, sun'iy intellekt sohasida ham samarali ishlarni amalga oshirmoqda.
