Mamlakatimizdagi mavjud ziyorat turizm salohiyatidan yanada unumli foydalanish, O‘zbekiston zaminini dunyo sivilizatsiyasining muhim markazlaridan biri sifatida namoyon qilish, jahon hamjamiyati va xalqaro tashkilotlarning yuqori e’tiroflariga sazovor bo‘lish, shuningdek, ziyorat turizmi xizmatlarini diversifikatsiya qilish maqsadida bugun Buxoro “Xalqaro ziyorat turizmi haftaligi”ga mezbonlik qilib turibdi.
Shu munosabat bilan, O‘zbekiston Respublikasi Prezidentining 26.04.2023 yildagi 135-sonli qarori ijrosi doirasida bugun, 29-noyabr kuni Buxoro davlat universitetiga Indoneziyaning Gunadarma universitetidan 35 kishilik delegatsiya tashrif buyurdi. Delegatsiya a’zolari tashrif avvalida universitetda yaratilgan shart-sharoitlar bilan yaqindan tanishib, talabalarning amaliy ishlaridan namunalarni ko’zdan kechirishdi.
BuxDUning katta majlislar zalida delegatsiya a’zolari hamda universitetimiz professor-oʻqituvchilari, talabalar-yoshlar ishtirokida ikki universitet hamkorligini yanada mustahkamlashga qaratilgan uchrashuv boʻlib oʻtdi.
Ushbu uchrashuv ikki davlat, Oʼzbekiston hamda Indoneziya, davlat madhiyalarining ijrosi bilan boshlandi.
Avvalo, Gunadarma universitetining taraqqiyot bosqichlari hamda hozirgi koʼrinishi aks etgan videorolik namoyish etildi. Shuningdek, BuxDU Ilmiy ishlar va innovatsiyalar bo'yicha prorektor Rasulov T.H. oʼzining kirish soʻzida Buxoro davlat universiteti haqida qisqacha maʼlumot berdi.
Uchrashuv davomida Gunadarma universitetining bir qator professorlari so’zga chiqib, o’zlarining ilmiy izlanishlari bilan tanishtirishdi.
Uchrashuv so’ngida ikkala tomon esdalik sovg'alari almashinildi.
