Universitet va Fransiya VATEL oliy instituti bilan hamkorlikda franshiza asosida tashkil etilgan “Xalqaro mehmonxona menejmenti” yo‘nalishida 2019-yildan boshlab kadrlar tayyorlanib kelinmoqda.
Hozirda universitetda VATEL oliy institutining bosh auditori hisoblangan Paul Dazemar tashrifini amalga oshirmoqda. 3 kunlik tashrif davomida hamkorlikda tashkil etilgan yo‘nalishda oxirgi 5 yil ichida amalga oshirilgan ishlar holati, talabalarning soha doirasida o‘qishi va amaliyot jarayonlarining tashkil etilganligi bilan tanishish, shuningdek, birinchi bitiruvchilarning bugungi kunda sohadagi bandligini o‘rganish hamda hamkorlikni kengaytirish maqsad qilingan. Birinchi kunda Xalqaro mehmonxona boshqaruvi yo‘nalishida dars beruvchi professor-o‘qituvchilar bilan tanishib, yo‘nalish o‘quv rejasida kelgusida amalga oshirilishi rejalashtirilgan o‘zgarishlar bo‘yicha tahliliy fikrlar so‘raldi.
Shuningdek, Paul Dazemar universitet rektori Obidjon Hamidov qabulida bo‘lib, hamkorlikni kengaytirish masalasida fikrlar almashinildi. Xususan, Obidjon Hamidov ushbu yo‘nalishda kadrlarni tayyorlash juda muhimligi, Buxoro viloyati iqtisodiyotida mehmondo‘stlik sohasining o‘rini yuqori ekanligini ta’kidlab, “Boqiy Buxoro” tarixiy-etnografik parki qurilishi natijasida soha kadrlariga nisbatan talab yuqori bo‘lishini inobatga olib, hamkorlikni kengaytirish zarurligini bildirdi.
Kunning ikkinchi yarmida Buxoro shahrida turli mehmonxonalarda amaliyotini o‘tayotgan talabalar bilan amaliyot joyida uchrashish maqsadida tashriflar amalga oshirilmoqda.
