Buxoro davlat universitetida mart oyi qizg'in kechmoqda. O'zbekning milliy qadriyati hashar bilan boshlangan shukuh daraxt ekish tadbirlari, "Sumalak Party" hamda Navro'zi olam sayliga ulanib ketdi.
Ezgu niyatlar bilan o't qalangan doshqozondagi Sumalak barchani birdamlikka chorlagan bo'lsa, bugun erta tongdan boshlangan Navro'z sayli asriy qadriyatlarimizni jonlantirdi.
—Navro'z — tinchlik, birdamlik, mehr-muhabbat, qadr ayyomidir. Dehqonbobo yerga urug' qadab, natijasini ezgu umid bilan intiqib kutganidek, har birimizga xayrli niyat bilan “qadagan urug'larimiz”ning natijasini ko'rish nasib etsin. "Olam nurga to‘lsin sen bilan, Navro‘z!" shiori ostida o'tkazilayotgan ushbu shodiyonamiz shukronamizning, tinchlik ne'matidan bahra olib ushbu kunlarga eson-omon yetganimizning izhoridir, —dedi BuxDU rektori Obidjon Xamidov barchani ayyom bilan tabriklash asnosida.
Sayl mobaynida O'zbekistonimizning turli go'shalariga monand tayyorlangan, urf-odat va an'analarimizni aks etgan dekoratsiyalar, talaba yoshlarimiz ijodi namunalari — bahoriy kayfiyat bag'ishlaydigan suratlar ko'rgazmasi, fakultet folklor dastalari tayyorlab kelgan azaliy marosimlar namoyishi, milliy raqs va kuy qo'shiqlar namoyish etildi.
Tantanada BuxDUning Buyuk Britaniya, AQShdan, Italiyadan tashrif buyurgan mehmonlari hayrat bilan o'z tassurotlarini o'rtoqlashishdi:
— O'zbekistonda bayramlar ajoyib ekan. Ko'rib hayratlandim. Barchasi maqtovga loyiq. Xalqingiz juda mehmondo'st va ahil ekan", — dedi Buyuk britaniyalik xalqaro tarjimon Kerol Ermakova.
Navro'z sayli mobaynida fakultet folklor dastalari tomonidan ijro etilgan "Kelin salom" marosimi, "Suz xotin" marosim qo'shig'i, surxoncha, samarqandcha, buxorcha raqslar, o'lan, lapar, aytishuvlar ijrosi betakror merosimizni yana bir karra jonlantirdi, desak aslo mubolag'a bo'lmaydi.
Yakunda har bir fakultet qimmatbaho esdalik sovg'alari bilan taqdirlanildi.
BuxDU Matbuot xizmati
