Yoshlarni vatanparvarlik ruhida barkamol inson bo‘lib tarbiyalanishiga shaxsiy namuna sifatida hissa qo‘shishdan iborat "Yangi O‘zbekiston – maktab ostonasidan boshlanadi” loyihasi doirasida Buxoro davlat universiteti rektori Obidjon Xamidov tashabbusi asosida G'ijduvon tumanidagi 1-son umumta`lim maktabida "Uch avlod uchrashuvi" bo‘lib o'tdi. Kuy-qo'shiqlar, sahna ko'rinishlari, she'rlar bilan yuqori kayfiyatda o'tkazilgan tadbir mehmonlar va mezbonlarda chuqur taassurot qoldirdi.
BuxDU rektori Obidjon Xamidov o'zi tahsil olgan sinf xonasiga kirib, maktabdagi tahsil yillari, o'qituvchilari, bo'lgan qiziqarli va ibratli voqealar xususida so'zlab berdi. O‘quvchilarga yangi O‘zbekistonda amalga oshirilayotgan islohotlar shukronasini “Kecha va bugungi hayot” misollarida tushuntirdi. Yaxshi o‘qishning natijalari qanday yuksak marralarga olib borishi haqida hayotiy misollar keltirdi.
BuxDU rektori Obidjon Xamidov va sobiq bitiruvchilar maktabdagi sinfxonalarga kirib, birma-bir o'quvchilar bilan suhbatlashishdi. Suhbat asnosida ularga Yangi O'zbekistonning munosib kishilari bo'lib hissa qo'shishlari kerakligi ta'kidlandi.
Har bir o'quvchi kamida ikkita xorijiy tilni bilishi kerakligi, axborot texnologiyalarini puxta egallashi, tinimsiz kitob o'qishi, o'z ustida ishlashi kerakligi aytildi.
Tashrif doirasida yoshlar o'rtasida sog'lom turmush tarzini keng tadbiq etish va ularning bo'sh vaqtlarida ommaviy sport o'yinlariga jalb etish maqsadida turli sport tadbirlari tashkil etildi.
Shuningdek, BuxDU rektori Obidjon Xamidov boshchiligidagi sobiq bitiruvchilar maktabda tashkil etilgan Orzular burchagida o'zlarining ezgu orzulari, tilaklarini yozib qoldirishdi.
