Ulug‘ o‘zbek shoiri, mutafakkir, tarixchi va davlat arbobi, markazlashgan davlat va boburiylar saltanati asoschisi Zahiriddin Muhammad Bobur tavalludining 541 yilligi yurtimizda keng nishonlanmoqda.
Xususan, Buxoro davlat universitetida ham “Ahbob yig'ilmoqni farog'at tutingiz” deb nomlangan, Filologiya hamda San'atshunoslik fakulteti professor-o'qituvchilari va talabalari tomonidan dasturlashtirilgan adabiy-badiiy, musiqiy kecha bo`lib o`tdi.
"Zahiriddin Muhammad Bobur shaxsi xususida so`z ketganda, inson sifatida ko'rgan kechirganlari, mustahkam davlat qurish mahorati va mashaqqatlari, otalik mehri, qarindoshlik an'analari, xarakteridagi tantilik va mardlik kabi sifatlarini o'rganish va o'rgatish muhim ahamiyat kasb etadi. Nafaqat shoh va shoir, balki qomusiy olim deya e'tirof etilgan Mirzo Bobur asarlari nafaqat sharq, balki hanuz G'arb mamlakatlarida ham sevib o'qilayotgani, qayta-qayta tarjima va yangi nashrlar qilinayotganining bosh sababi uning nuktadon va rostgo'y shaxsiyatidadir, - dedi BuxDU rektori, iqtisodiyot fanlari doktori Obidjon Xamidov samimiy fikrlarini bildirish asnosida.
Tadbirning badiiy qismida Filologiya fakulteti talabalari tomonidan Zahiriddin Muhammad Bobur hayoti aks etgan sahna ko'rinishlari namoyish etildi. Mahorat bilan ijro etilgan kuy-qo'shiqlar va raqslar esa barchaga a'lo kayfiyat bag'ishladi.
Adabiy-badiiy, musiqiy kecha mobaynida Zahiriddin Muhammad Bobur tavalludining 541 yilligiga bag`ishlab “Adolatli shoh va buyuk shoir ” shiori ostida o`tkazilgan tanlov g`oliblari taqdirlanishdi.
“Eng yaxshi insho”, “Eng yaxshi g‘azalxon talaba”, “Boburga atab bitilgan eng yaxshi she’r” nominatsiyalarida birinchi, ikkinchi, uchinchi o`rin olgan talabalar universitet tomonidan maxsus diplom pul mablag‘lari bilan rag‘batlantirildi.
