Buxoro davlat universitetida jahonning ko‘plab nufuzli oliy ta’lim muassasalari bilan yaqin hamkorlik munosabatlari o‘rnatilgan bo‘lib, bu ilm-fan va ta’lim sohasidagi qo‘shma loyihalarda o‘z aksini topib kelmoqda. Shunday hamkorlardan biri Ispaniyaning Valensiya politexnika universiteti bo‘lib, ushbu oliygoh jahon akademik reytinglarida Top-500 qatorida o‘rin egallaydi (www.upv.es). VPU bilan BuxDU o‘rtasidagi hamkorlik doirasida 25 nafardan ortiq talaba, tadqiqotchi, professor-o‘qituvchi almashinuvi amalga oshirilgan, xalqaro loyihalar birgalikda bajarilgan. Bunda nafaqat Yevropa Ittifoqining Erasmus dasturi, balki “El-yurt umidi” jamg‘armasi, OTFIV huzuridagi Innovatsion rivojlanish agentligi imkoniyatlaridan, shuningdek BuxDUda ilm-fanga yo‘naltirilgan moliyaviy manbalardan ham samarali foydalanilgan. E’tiborli jihati, o‘zaro hamkorlikda ilmiy tadqiqotlarga alohida ahamiyat berilib, bugungi kunda BuxDUdan 6 nafar tadqiqotchi Valensiya politexnika universitetida qo‘sh rahbarlik shaklidagi doktoranturada o‘z ilmiy ishlarini olib borishmoqda.
30 noyabr kuni BuxDU va VPU o‘rtasidagi hamkorlikda yangi sahifa ochildi. Qo‘sh rahbarlik asosidagi doktoranturada birinchi dissertatsiya himoyasi amalga oshirildi. O‘z ilmiy tadqiqotini yakunlagan Xalqaro hamkorlik departamenti boshlig‘i Muhriddin Qilichov “Buxoro viloyatida barqaror turizm rivojlanishi uchun Buyuk ipak yo‘li merosidan samarali foydalanish: joriy holat tahlili va istiqbollar” mavzusidagi dissertatsiyasini xalqaro komissiya oldida muvaffaqiyatli himoya qildi. Tadqiqotchiga VPU professorlari M.T.Serrano, M.S.Mendes, BuxDUdan esa prorektor A.Jo‘rayevlar rahbarlik qilishgan.
Tadqiqotchi M.Qilichov dissertatsiya tadqiqotlarini olib borishda qo‘llab-quvvatlagan ilmiy rahbarlari, Buxoro davlat universiteti, Valensiya politexnika universiteti, “El-yurt umidi” jamg‘armasi, OTFIV huzuridagi Innovasion rivojlanish agentligi rahbariyatiga o‘z minnatdorchiligini bildiradi.
