Davlat ramzlari hamisha muqaddas va ulug‘ sanaladi. Chunki u xalqning o‘tmishi, buguni va kelajagini o‘zida mujassam etgan Vatanning yorqin timsolidir. O‘zbekiston mustaqillikka erishganining dastlabki yilidanoq mamlakat suverenitetining muhim belgisi – Davlat bayrog‘iga ega bo‘ldi. Mustaqillik, ozodlik, tinchlik, barqarorlik va hurlik timsoli bo‘lgan Davlat bayrog`imiz qabul qilinganiga 32 yil to`ldi. Bugun BMT binosida unga a’zo bo‘lgan barcha mustaqil davlatlar qatori O‘zbekistonning ham bayrog‘i hilpirab turibdi.
O‘zida juda katta ma’no-mazmunni mujassam etgan, yuksak did va mahorat bilan puxta ishlangan, butun O‘zbekiston ahlining asriy orzu-istaklarini, g‘ayrati va shijoatini, xalqimizga xos mehmondo‘stlikni, ajdodlar yodi hamda millat g‘ururini mujassam etgan bayrog‘imiz barcha mamlakatlarning davlat ramzlari orasida alohida hurmat va ehtiromga sazovordir.
Milliy bayrog‘imizning davlat idora va muassasalari, o‘quv yurtlari, O‘zbekiston a‘zo bo‘lgan xalqaro tashkilotlar, chet ellardagi elchixona va doimiy vakolatxonalarimiz peshtoqida hilpirab turishi, turli bayram va tantanalarda, mamlakatimiz vakillari qatnashayotgan xalqaro miqyosdagi siyosiy, madaniy-ma‘rifiy tadbirlarda, nufuzli sport musobaqalarida Vatanimizning sha‘ni, xalqimizning g‘ururini yorqin aks ettirishi barchamizga iftixor bag`ishlaydi. Xalqaro sport bellashuvlarida g‘alaba qozongan sportchi talaba-yoshlarimiz sharafiga yurtimiz bayrog‘i baland ko‘tarilgan lahzada har birimiz cheksiz hayajonga tushamiz. O‘zbekiston Respublikasi davlat suverenitetining ramzi bo`lgan, ozod va erkin hayotimiz, yorug‘ kelajagimizga bo‘lgan ishonchimiz ifodasi hisoblangan jonajon bayrog`imiz qabul qilingan sana munosabati bilan yurtdoshlarimizni samimiy qutlayman.
Barcha millatlar turli xil xavf-xatarlardan xoli, emin-erkin holda ahil-inoq yashab kelayotgan musaffo osmonimiz, obi hayot, tabiatning yangilanishi hamda yurtimizning jannatmonand ekanligi, davlatimiz fuqarolarining o‘zaro hamjihatlikda, bir-birini hurmat qilib, diniy bag‘rikenglik tamoyillari asosida tinch-totuv yashayotgani, hayotiy qudrat, navqironlik, umid va shodumonlik timsoli bo`lgan bayrog`imiz boshimiz uzra hamisha mag`rur hilpirayversin!
