Qadrli universitetimiz talaba-yoshlari!
Bugungi bayram “17-noyabr – Xalqaro talabalar kuni” munosabati bilan barchangizni samimiy muborakbod etaman.
Bugun millati, dini, mamlakati, ta'lim muassasasi va yo'nalishidan qat'iy nazar barcha talabalarning birlashuv kunidir.
Siz aziz O'zbekiston yoshlarining hur diyorimiz Uchinchi Renessans poydevorini yaratishda ilm olishga chog'langaningiz uning eng muhim bo'g'inlari bo'lgan oliy ta'lim va ilmiy-madaniy dargohlarda yetuk kadr bo'lish uchun jadal harakat qilayotganingiz e'tirofga sazovor.
Bugungi shiddatli zamonda, global miqyosda raqobat kuchayib borayotgan murakkab vaziyatda ko'p tillarda erkin muloqot o'rnatadigan, axborot-kommunikatsion texnologiyalarini yuqorida saviyada bilish asnosida ularni yarata oladigan kadrlarga ehtiyoj har qachongidan ortib bormoqda. Sizda dovrug'i dunyoni tutgan ajdodlarimizning natijalarini ko'rishni istaymiz. Orangizda shu ezgu niyatimizga mos yoshlarning borligi, jamiyat hayotida faol ishtirok etayotgani bizni quvontiradi.
Shu o‘rinda e’tirof etish joizki, oliygohimizda tahsil olayotgan 24 mingdan ortiq yuqori salohiyat va iqtidorga ega talaba-yoshlarimiz tahsil olmoqda. Ular orasida mahalliy, xalqaro fan olimpiadalarda, o‘z sohalarida, qolaversa, sport va boshqa yo‘nalishlar bo‘yicha respublika va jahon miqyosida erishayotgan yutuqlari tahsinga sazovor.
Beg'ubor va navqiron fasl egalari! Orzu-umidlaringiz, beqiyos imkoniyatlaringizga har birimiz havas qilamiz. Kezi kelganda, sizning shijoatingizdan ilhom olamiz.
Sizni bayram bilan yana bir bora qutlayman. İlm olish mobaynida chekkan mashaqqatingiz mevasini ko'rishingizni, Yangi O'zbekistonning zabardast, navqiron, peshqadam farzandlari bo'lishingizni, Vatan ravnaqiga kamarbasta munosib talaba sifatida hissa qo'shishingizni tilayman.
Eng ajoyib bayramingizda sizni chin dildan qutlayman.
Hurmat bilan
Xamidov Obidjon Xafizovich,
Buxoro davlat universiteti rektori,
iqtisodiyot fanlari doktori, professor
