Hurmatli yurtdoshim!
Ona diyorimizga dilbar faslning go`zal bayrami – sharqona yangi yil – Navro‘zi olam kirib kelmoqda. Uch ming yildan ziyod tarixga ega Navro‘zi olam o‘zining yangilanish, bahor nafasini boshlab kelishi, barcha gina-kuduratlarga chek qo`yib, to`kin-sochinlik, qut-baraka keltirishi bilan betakror bayramlarimizdan biridir.
Navro‘z biror bir millat yoki madaniyatning bayrami emas, balki butun insoniyat merosining ajralmas qismiga aylangan. Ayniqsa, jonajon O`zbekistonimizda yashayotgan barcha millat va elat vakillari uchun, butun xalqimiz uchun eng suyukli bayramdir. Birlashgan Millatlar Tashkilotining qarori bilan 21 mart — butun dunyoda Xalqaro Navro‘z kuni sifatida keng nishonlanishi bejizga emas. Hamjihatlik, totuvlik, qadr-qimmat, mehr-oqibat ayyomini har qancha e’tirof etsak, oz. Yasharish faslining muruvvatidan umid qilib, ko`chatlar ekamiz, bog` yaratamiz. Yaqin-uzoqlar holidan xabar olamiz. Bemorlar, ota-onalar, yor-u birodarlar ziyoratiga oshiqamiz. Mana shunday xosiyatli kunlarda o`zimizdan ezgu amal qoldirishga harakat qilamiz.
Hurmatli o‘qituvchi-professorlar, talaba-yoshlar! Sizlarni mana shu go‘zal, tarovatli kunlarda Navro‘z ayyomi bilan chin dildan qutlashdan mamnunman.
Barchangizga sog‘liq-omonlik, oilalaringizga tinchlik-xotirjamlik, baxt-saodat tilayman. Ilmiy izlanishlaringiz va o‘qishlaringizda, xayrli maqsadlaringizni amalga oshirishda omad yor bo‘lsin. Navro‘zi olamning shodligi barchamizni yaxshi ishlarga undasin. Butun dunyoda tinchlik va xotirjamlik bo'lishini, uzoq va yaqin barcha davlatlarning xalqlariga taraqqiyot, farovonlik hamda ravnaq topishini Allohdan so`raymiz.
Navro`z –mehr-muhabbat, qadr, umid bayramidir. Dehqonbobo yerga urug` qadab, natijasini ezgu umid bilan intiqib kutganidek, har birimizga xayrli niyat bilan “qadagan urug`larimiz”ning natijasini ko`rish nasib etsin. Har bir oila, har bir xonadonda yaxshi kunlar, to'y-tomoshalar ko'p bo'lsin! Barchamizning ezgu orzu-niyatlarimiz ushalsin!
Kirib kelayotgan bahoriy tengkunlik – Navro`zi olam bilan yana bir bor chin qalbimdan tabriklayman. Har kunimiz Navro`z bo`lsin!
Hurmat bilan,
Buxoro davlat universiteti rektori,
iqtisod fanlari doktori, professor Obidjon Xamidov
