Joriy yilning 17-yanvaridan Pedagogik ta’lim fakulteti Boshlang‘ich ta’lim metodikasi hamda Maktabgacha ta’lim kafedrasining xalqaro hamkorlik shartnomasiga muvofiq M.Avezov nomidagi Janubiy Qozog‘iston universitetidan xalqaro hamkorlik yuzasidan 2 nafar professor-o‘qituvchilar o‘quv mashg‘ulotlari olib borish uchun Buxoro davlat universitetiga tashrif buyurishdi.
M.Avezov nomidagi Janubiy Qozog‘iston universiteti Maktabgacha va boshlang‘ich ta’lim kafedrasi mudiri, pedagogika fanlari nomzodi, dotsent Ermekbayev Muxtar Abenovich va pedagogika fanlari nomzodi, dotsent Tursunbayev Abay Zakirovichlar xalqaro hamkorlik doirasida ikkala kafedra professor-o‘qituvchilariga master-klass va ilmiy tadqiqot ishlarini amalga oshirishda xalqaro tajriba yuzasidan seminarlar tashkil etish, dars o‘tish yuzasidan tavsiyalar berish kabi ishlar rejalashtirilgan.
Tashrifning birinchi kuni Buxoro davlat universiteti o‘quv ishlari prorektori R.Gʻ.Jumayev bilan ikkala universitet o‘rtasida hamkorlik bo‘yicha amalga oshirilishi rejalashtirilgan ishlar yuzasidan yo‘l xaritasi tuzildi. Tuzilgan yo‘l xaritaga asosan ikkala universitet o‘rtasida boshlang‘ich ta’lim va maktabgacha ta’lim yo‘nalishlarida talaba almashinuvini yo‘lga qo‘yish, ta’limni transformasiyalash, qo‘shma dastur asosida qabulni amalga oshirish, ta’lim jarayoniga xorij tajribasini tatbiq etish, hamkorlikda ilmiy tadqiqot ishlarini amalga oshirish, Scopus bazasidagi jurnallarda maqolalar chop ettirish, monografiyalar nashr ettirish kabi vazifalar belgilab olindi.
