+998 (65) 221 27 14

Yangiliklar

  1. Bosh sahifa  
  2. Yangiliklar  
  3. YANGI BINO—YANGI MUVAFFAQIYAT!

YANGI BINO—YANGI MUVAFFAQIYAT!

26.11.2022

Buxoro davlat universitetida talabalarning sifatli ta'lim olishi, o`quv jarayonlarini qulay muhitda o`zlashtirishi, barcha shart-sharoitga ega zamonaviy auditoriyalarda o`qishlari uchun bor kuch va salohiyat safarbar qilinmoqda. Buning yorqin misoli sifatida bugun ochilish marosimi o`tkazilgan Buxoro davlat universiteti Xorijiy tillar fakultetining yangi o`quv binosini aytish mumkin.

Buxoroning so`lim markaziy ko`chalaridan birida qad rostlagan yangi bino talabalar uchun chinakam tuhfa bo`ldi. Oliy va o‘rta maxsus ta’lim vaziri o‘rinbosari Sarvarxon Buzrukxonov, Buxoro viloyati hokimining o‘rinbosari Mirali Hamroyev, Buxoro davlat universiteti rektori Obidjon Xamidov hamda Xorijiy tillar fakulteti dekani Nozimjon Ataboyevlar hamda ko`p sonli pedagog-xodimlar, talabalar ishtirokida tantanali ochilish marosimi bo`lib o`tdi.
Mukammal ta'mirdan chiqqan ushbu yangi bino 4 qavatdan iborat bo`lib, binoning 42 ta o’quv xonasida 3 smenada o’quv jarayonlari tashkil etilmoqda. 1-smenada 49 ta guruhda 641 nafar, 2-smenada 47 ta guruhda 555 nafar va 3-smenada 7 ta guruhda 104 nafar talaba tahsil olmoqda. 
Yangi binodagi kafedralar hamda auditoriyalar bilan tanishish asnosida Fransuz filologiyasi kafedrasiga "Qo`shma dastur" asosida Fransiyadan tashrif buyurgan o`qituvchi Evan bilan samimiy suhbatlashildi. BuxDUdagi faoliyati haqida o`rtoqlashgan Evan bugungi kunda talabalarning tirishqoqligi, tez kunlarda yaxshi natijalar ko`rsatishlari xususida gapirdi.
Endilikda bu yerda yangicha o`quv xonalari, kafedralar, oshxona,  faollar zali, kutubxona bunyod etildi. Fakultetda xorijiy tillar sohasiga qiziquvchan yoshlarning ta’lim sohasini puxta o‘zlashtirishlari uchun nimaiki zarur bo‘lsa, barchasi hozirlanmoqda.
Yaxshidan bog` qoladi, degan umrboqiy xalq naqli bor. Darhaqiqat, inson yangi bino rostlar ekan, tabiiyki bir dona bo`lsa ham umrboqiylikka daxldor bo`lish uchun ko`chat ekadi. Bugungi yangi bino hududida ham "Yashil makon" loyihasi doirasida ko'kalamzorlashtirish uchun ajratilgan yer maydonida mehmonlar daraxt ekish kabi xayrli ishni amalga oshirdilar.