Xalqimiz orasida Mehmon kelsa pastga tush, palov bersa ahdga tush, degan naql bor. Darhaqiqat ushbu taom juda qadimgi milliy taomlarimizdan biri hisoblanadi. Ba'zi manbalarga ko'ra, palovning tayyorlanish uslubi eramizdan avvalgi 2-3-asrlarda qadimgi O'rta Osiyo va Yaqin Sharq xalqlari orasida ommabop hisoblanadi. Jumladan, O'zbekistonda o'zbekcha palov o'zbek oshxonasining eng asosiy taomlaridan biri hisoblanadi, har bir xonadonda, to'y-hashamlarda va dunyoning boshqa davlatlarida sevib iste'mol qilinmoqda. 2016-yilda o'zbek palovi Yuneskoning nomoddiy madaniy merosi ro'yxatiga kiritildi.
Buxoro davlat universitetining Talabalar turar joyida bo`lib o`tgan osh chempionati mobaynida o`zbekona qadriyatlarimizdan biri yana “ko`z ochdi”.
Azaldan, uch erkak ko`rishsa, osh bahona diydorlashishgani bugungi kunga qadar an’ana tusini olgan. Guruchlarni tilga kirgudek obi-tobida pishirgan ham, palov bahona kayfiyatni oshirgan ham erkaklar. O`g`lon talabalarimiz o`zlarini o`zbek oshxonasida ham sinab ko`rishdi. Chempionat davomida yigit talabalar tomonidan nafaqat milliy taomimiz boʻlgan palovxontoʻraning Samarqandcha, Buxorocha, Farg`onacha, Sofi osh, Ivitma palov kabi turlarining tayyorlanish jarayonlari bilan tanishildi, balki, ularning an’analarimiz, marosimlarimizni nechog`lik bilishlari, o`zbekona qadriyatlarga hurmat kabi sifatlari ham sinovdan o`tkazildi.
Shuningdek, turli aql o`yinlari – shaxmat, shashka birodarlik ruhini oshirgan bo`lsa, san’atshunoslik fakultetining iqtidorli ijrochilari tomonidan uyushtirilgan konsert dasturi va qiziqarli chiqishlar yig`ilganlarni mamnun etdi.
Rektor boshchiligidagi rahbariyat jamoasi qozonlarni oralab, oshpaz talabalarning mahoratiga baho berdilar.
Palovxonto`ra bahona madaniy hordiq, doʻstona suhbat, ustozlarning tashrifi tadbirga oʻzgacha shukuh bagʻishladi.
