Bugun Buxoro davlat universitetida ko`p yillardan beri qizg`in faoliyat olib borayotgan “O`zbek-yapon markazi”ning 15 yilligi nishonlandi.
Ushbu sana munosabati bilan tashkil etilgan ko‘rgazmada mehmonlar markaz hayotiga bag‘ishlangan videorolik va fotoko‘rgazmani tomosha qilish orqali markaz faoliyati bilan yaqindan tanishish imkoniyatiga ega bo‘ldilar. Did bilan tashkil etilgan Yapon burchagi Yaponiyadagi yapon tili kurslari va ta'lim haqida ma'lumot olish imkonini berdi. Bu esa ta'lim viktorinasida qatnashib, Yaponiya haqidagi bilimini sinab ko`rmoqchilar uchun ayni muddao bo`ldi. Barcha uchun tashkil etilgan Yaponiya madaniyatiga bag'ishlangan bayram mashg'ulotlari qatnashuvchilarga ko`tarinki ruh bag`ishladi.
Kiyinish Yukata (an'anaviy yapon ayollar kiyimlari) burchagida yapon ayollari uslubining nozik jihatlaridan bahramand bo'lishdi.
Bugun barchamiz uchun quvonchli kun, markazimiz 15 yoshga to`ldi, – deya o`z samimiyatini izhor etdi Janob Yasujiro Suzuki. – Qayd etish joizki, 15 yil davomida markazga tashrif buyurganlar soni 220 000 kishidan oshdi. Bundan tashqari, bugungi kunda yapon tili kurslarida tahsil olayotganlar soni 90 kishi bo’lib, hozirgi kungacha 3000 dan ortiq talaba markazimizda tahsil olgan. Koronavirusning ta’siri kamayib borishi Buxoro shahrining turizm sohasidagi iqtisodiyotning rivojlanishiga olib keladi. Bu esa albatta o’z navbatida, yapon tili ta’limi, madaniyat almashinuvi bilan birgalikda biznes sohasining rivojlanishiga ham olib keladi. Bizni qo`llab-quvvatlayotgan, tasahbbuslarimizni iliq qarshilayotgan Buxoro davlat universiteti jamoasiga o`z minnatdorchiligimizni bildiramiz. Bayramdan zavqlaning, barchasi siz uchun!
Yaponiya O‘zbekiston uchun muhim va yaqin hamkor bo‘lib, ushbu mamlakat bilan munosabatlar O‘zbekiston tashqi siyosatining ustivor yo‘nalishlaridan hisoblanadi. 2022-yildan boshladi, o‘zaro munosabatlarimiz strategik sheriklik darajasiga ko‘tarilgan. Madaniy-gumanitar sohadagi hamkorlik alohida e’tiborga molik, zero, Yaponiya va O‘zbekistonning madaniy va ma’rifiy o‘ziga xosligi, o‘xshash tomonlari juda ko‘pdir. Buxoro davlat universitetida 15 yildan beri faoliyat olib borayotgan ushbu markaz ko`plab g`ayratli yoshlarning qobiliyatini yuzaga chiqargani, hayotda o`z o`rnini topishida ko`maklashgani, dunyo bilan yuzlashishiga sababchi bo`lgani bilan e’tirofga sazovor, - dedi BuxDU rektori Obidjon Xamidov mehmonlarni samimiy tabriklash asnosida.
Ushbu ayyom munosabati bilan tashrif buyurgan mehmonlar katta bayram konsertidan bahramand bo`lishdi. Yaponiyaning shimoliy orolidan kelgan baliqchilarning “Soran Bushi” raqsi yangradi. Buxoro shahridagi 15-umumiy o`rta ta’lim maktabi o‘quvchilari tomonidan raqslar ijro etildi. Shuningdek, konsert dasturida “Tokio Bon” yapon raqslari, xususiy maktab o‘quvchilarining “Senbonzakura”, “Maru Maru Mori Mori” raqslari, Prezident maktabi o‘quvchilarining yapon qo‘shiqlari yangradi. Ayniqsa, yapon moda namoyishi yig`ilganlariga ayricha taassurot qoldirdi.
Ma’lumot o`rnida aytish joizki, O‘zbek-yapon markazining Buxoro shahridagi vakolatxonasi 2007-yil 28-martda ochilgan. Markaz ochilganidan buyon kunchiqar yurt madaniyati va tili, shuningdek, yapon xalqining an’analari bilan yaqindan tanishtirish bobida talaygina xayrli ishlarni amalga oshirib kelmoqda. Ushbu markazning Buxoro shahridagi vakolatxonasi Yapon tiliga qiziquvchilarga til o`rgatish, madaniy tadbirlar, jumladan, origami kurslari, choy marosimlari, an'anaviy yapon raqslari, xattotlik, anime namoyishlari, turli mahorat darslari, tanlovlar o'tkazish, qisqa muddatli biznes seminarlar o'tkazish, Yaponiya hayoti va madaniyati bilan yaqinroq tanishmoqchi boʻlgan maktab oʻquvchilari va talabalari uchun ekskursiyalar, Yaponiya haqida maʼlumot beruvchi hujjatli filmlarni tomosha qilish kabi bir-biridan qiziqarli tadbirlarni amalga oshirib kelmoqda.
Markazning asosiy vazifalaridan biri O‘zbekiston va Yaponiya xalqlari o‘rtasidagi o‘zaro anglashuvni mustahkamlashga ko‘maklashishdan iborat bo`lib, ushbu yo`lda raqs festivali, choy marosimi, origami tanlovi, karaoke tanlovi, Cosplay, sport musobaqalari, yapon tili talabalari o'rtasida notiqlik musobaqasi kabi qiziqarli tashabbuslar yo`lga qo`yilgan.
