11.01.2022

Har qanday davlatning tarixiy taraqqiyot yo‘lidan ma’lumki, yurtning jadal rivojlanishi, muayyan yutuqlarga erishishi, xalqning farovon bo‘lishi o‘sha davlatda yoshlar ta’lim-tarbiyasi va kelajagiga beriladigan e’tibor darajasiga chambarchas bog‘liq. Shu ma’noda, O‘zbekistonda yoshlar masalasi davlat siyosatining eng ustuvor yo‘nalishlaridan biri hisoblanadi. Mamlakatda yoshlarning huquq va manfaatlarini himoya qilish, ularga zarur shart-sharoitlar va imkoniyatlarni yaratib berish borasida mustahkam huquqiy baza yaratilgan va bu tizim zamon talablariga hamohang ravishda takomillashtirib borilmoqda.Shu munosabat bilan 2021 yilning 23-yanvar kuni O‘zbekiston Respublikasi Prezidenti huzuridagi davlat xizmatini rivojlantirish agentligi direktorining birinchi o‘rinbosari Xasanov Otabek Abdurashidovich Buxoro davlat universitetida bo‘ldi. Dastlab Agentlik direktorining birinchi o‘rinbosari universitetda tashkil etilgan Buxoro biznes akseleratoriga tashrif buyurib, u yerda yaratilgan shart-sharoitlar, biznes-treninglar, robototexnika kurslari bilan yaqindan tanishdi. Shuningdek, universitetning o‘quv, ilmiy, ma’naviy hamda xalqaro hamkorlik faoliyati bilan BuxDU rektori Obidjon Xamidov ko‘rgazmali ma’lumotlar asosida yaqindan tanishtirdi. Otabek Xasanov universitet katta yig‘ingohida faol iqtidorli yosh bitiruvchi talabalar, magistrlar, tadqiqotchilar, professor o‘qituvchilar hamda universitet rahbariyati bilan uchrashdi.  Ushbu uchrashuvni Buxoro davlat universiteti rektori Obidjon Xamidov kirish so‘zi bilan ochib berdi.O‘zbekiston Respublikasi Prezidenti huzuridagi davlat xizmatini rivojlantirish agentligi direktorining birinchi o‘rinbosari dastavval davlatimiz rahbari raisligida joriy yilning 19 yanvar kuni ma’naviy-ma’rifiy ishlar tizimini tubdan takomillashtirish, bu borada davlat va jamoat tashkilotlarining hamkorligini kuchaytirish masalalari bo‘yicha bo‘lib o‘tgan videoselektor yig‘ilishi va unda ko‘tarilgan masalalar, tizim xodimlari zimmasiga yuklatilgan vazifalar xususida to‘xtalib o‘tdi.Ochiq muloqot tarzida o‘tgan uchrashuvda davlatimizni ijtimoiy-iqtisodiy rivojlantirish bo‘yicha ustuvor vazifalarga muvofiq kadrlar tayyorlashning mazmunini tubdan ko‘rib chiqish, oliy ta’lim muassasalarida kadrlar seleksiyasini tizimli yo‘lga qo‘yish, xalqaro standartlarga mos oliy ma’lumotli mutaxassislar tayyorlashda zarur shart-sharoitlar yaratishga oid ishlar tahlil qilindi.Uchrashuvda 2020-2021 o‘quv yili universitet bitiruvchi talabalarini ish bilan ta’minlash masalasiga hozirdan alohida e’tibor qaratish hamda bu borada manfaatdor boshqarma va idoralar bilan uzviylikni kuchaytirish zarurligi ta’kidlab o‘tildi.— Yangi O‘zbekistonni barpo etishdek ezgu maqsad yo‘lidan borayotgan ekanmiz, endilikda yoshlar istiqboliga qaratilgan faoliyatni ham yangi pog‘onaga ko‘tarishimiz zarur, – deya ta’kidladi jumladan direktor o‘rinbosari.Uchrashuv ochiq muloqot tarzda o‘tdi, Agentlik direktorining o'rinbosari tomonidan BuxDU Xalqaro hamkorlik bo'yicha prorektori A.T.Jo'rayevga "Liderlar kitobi" taqdim etildi. Uchrashuv jarayonida ishtirokchilarning fikr-mulohazalari va takliflari tinglandi. Qizg‘in munozara va muhokamalarga ulanib ketgan uchrashuv yakunida takliflar umumlashtirilib, tegishli vazifalar va kelgusidagi rejalar belgilab olindi.BuxDU Matbuot xizmati