Buxoro davlat universiteti Yuridik fakultetida yoshlar o‘rtasida huquqbuzarliklarning oldini olish, kiberjinoyatchilikka qarshi kurashish hamda internet makonidagi ma’naviy tahdidlardan himoyalanish masalalariga bag‘ishlangan davra suhbati tashkil etildi.
Tadbirda Buxoro viloyati IIB Axborot texnologiyalari sohasidagi jinoyatlarga qarshi kurashish boshqarmasi xodimi, kapitan Jamshid Islomov, Yuridik fakulteti yoshlar masalalari, ma’naviy-ma’rifiy ishlar bo‘yicha dekan o‘rinbosari I.I. Roziqov, tyutorlar T.M. Aslonova va Z.Q. Ayosova hamda Raqamli ta’lim texnologiyalari departamenti muhandis-dasturchisi R.N. Salimov ishtirok etdi.
Davra suhbati davomida fakultetning 2-bosqich 5-1yurs25 kechki va 5-2yurs25 kechki guruhlari talabalari bilan “Yoshlar o‘rtasida huquqbuzarliklarning oldini olish va kiberjinoyatchilik”, “Terrorizmga qarshi kurashish, internet maydonidagi ma’naviy tahdidlar” mavzularida atroflicha fikr almashildi.
Tadbirda so‘zga chiqqan mutaxassislar tomonidan bugungi kunda internet tarmog‘i orqali sodir etilayotgan kiberjinoyatlar, firibgarlik holatlari, shaxsiy ma’lumotlar va akkauntlar xavfsizligini ta’minlash, ijtimoiy tarmoqlardan to‘g‘ri foydalanish hamda turli zararli axborotlar ta’siriga tushib qolishning oldini olish bo‘yicha muhim tushunchalar berildi.
Shuningdek, yoshlarning huquqiy savodxonligini oshirish, ekstremistik va terroristik g‘oyalar targ‘ibotidan ogoh bo‘lish, shubhali havolalar va noma’lum manbalardan kelayotgan xabarlarga nisbatan ehtiyotkorlik bilan munosabatda bo‘lish zarurligi alohida ta’kidlandi.
Uchrashuv yakunida talabalar o‘zlarini qiziqtirgan savollarga mutaxassislardan batafsil javoblar oldilar.
Mazkur tadbir yoshlar o‘rtasida huquqiy madaniyat, axborot xavfsizligi va kibergigiyena ko‘nikmalarini shakllantirish, ularni turli tahdid va huquqbuzarliklardan ogoh etishda muhim ahamiyat kasb etdi.
UZ