Maxsus imkoniyatlar

Axborot xavfsizlikka doir tadbirlar

calendar 12.11.2026

Buxoro davlat universitetida kibermadaniyatni yuksaltirishga qaratilgan profilaktik suhbat tashkil etildi

2026-yil 12-noyabr kuni Buxoro davlat universitetining Iqtisodiyot va turizm fakultetida “Kibermadaniyatni yuksaltirish va kibergigiyenani shakllantirish” oyligi doirasida talaba-yoshlarning kiberxavfsizlik bo‘yicha bilim va ko‘nikmalarini oshirish, internet tarmog‘idan xavfsiz foydalanish madaniyatini shakllantirish hamda kiberjinoyatlarning oldini olish maqsadida profilaktik suhbat tashkil etildi.

Mazkur tadbir Buxoro davlat universiteti profilaktika inspektori Sh. Raxmatova, Iqtisodiyot va turizm fakulteti tyutori S. Hikmatova hamda Raqamli ta’lim texnologiyalari departamenti xodimi R. Salimov hamkorligida tashkil etilib, unda fakultetning 3-2 IQT 26, 3-3 IQT 26 va 3-4 IQT 26-guruh talabalari ishtirok etdi.

Profilaktik suhbat davomida talabalarga bugungi kunda internet va ijtimoiy tarmoqlar orqali sodir etilayotgan kiberjinoyatlar, onlayn firibgarlik holatlari, shaxsiy ma’lumotlarning daxlsizligini ta’minlash hamda raqamli muhitda xavfsizlik qoidalariga rioya qilishning ahamiyati yuzasidan tushuntirishlar berildi.

Xususan, noma’lum manbalardan yuborilayotgan shubhali havolalar va zararli fayllarni ochmaslik, ijtimoiy tarmoqlarda tarqatilayotgan soxta reklama va yolg‘on xabarlarga ishonmaslik, bank plastik kartalari rekvizitlari, SMS tasdiqlash kodlari hamda shaxsiy akkauntlarning himoya parollarini begona shaxslarga oshkor qilmaslik masalalariga alohida e’tibor qaratildi.

Shuningdek, kiberfiribgarlar tomonidan qo‘llanilayotgan turli aldov usullari, jumladan, noma’lum telefon raqamlaridan qo‘ng‘iroq qilish, pul mukofoti va sovg‘alar va’da qilish, soxta internet sahifalari orqali shaxsiy ma’lumotlarni qo‘lga kiritishga urinish kabi holatlardan ogoh bo‘lish zarurligi ta’kidlandi.

Tadbir davomida talaba-yoshlarga kundalik hayotda kibergigiyena qoidalariga amal qilish, internet resurslaridan mas’uliyat bilan foydalanish, shubhali xabar va takliflarga tanqidiy yondashish yuzasidan tavsiyalar berildi.

Mazkur profilaktik suhbat talaba-yoshlarning kiberxavfsizlik sohasidagi xabardorligini oshirish, ularda kibertahdidlarga qarshi immunitetni shakllantirish hamda raqamli makonda xavfsiz faoliyat yuritish ko‘nikmalarini mustahkamlashga xizmat qiladi.

#KibermadaniyatOyligi2026