Buxoro davlat universitetining Iqtisodiyot va turizm fakultetida “Kibermadaniyatni yuksaltirish va kibergigiyenani shakllantirish oyligi” doirasida talaba-yoshlarning axborot xavfsizligi sohasidagi bilim va ko‘nikmalarini oshirish, ularni zamonaviy kibertahdidlardan ogoh etish hamda raqamli muhitda xavfsiz faoliyat yuritish madaniyatini shakllantirishga qaratilgan targ‘ibot-tushuntirish tadbiri tashkil etildi.
Mazkur tadbirda Buxoro davlat universiteti Raqamli ta’lim texnologiyalari departamenti muhandis-dasturchisi, axborot xavfsizligi bo‘yicha mas’ul xodim R.N. Salimov ishtirok etib, talabalarga bugungi kunda dolzarb bo‘lib borayotgan kiberxavfsizlik masalalari yuzasidan batafsil ma’lumotlar berdi.
Tadbir davomida zamonaviy kiberjinoyatlarning turlari, internet va ijtimoiy tarmoqlar orqali amalga oshirilayotgan firibgarlik holatlari, shaxsiy ma’lumotlar va bank kartalari xavfsizligini ta’minlash, shuningdek, zararli dasturlar va shubhali havolalardan himoyalanish usullari haqida tushuntirish ishlari olib borildi.
Xususan, so‘nggi vaqtlarda ijtimoiy tarmoqlar va messenjerlar orqali tarqatilayotgan zararli .APK fayllarning xavfi, ularni mobil qurilmalarga o‘rnatish natijasida yuzaga kelishi mumkin bo‘lgan salbiy oqibatlar, shaxsiy ma’lumotlarning uchinchi shaxslar qo‘liga tushib qolishi hamda bank hisobvaraqlariga ruxsatsiz kirish holatlarining oldini olish masalalariga alohida e’tibor qaratildi.
Shuningdek, talabalarga internet tarmog‘idan foydalanishda murakkab va ishonchli parollarni qo‘llash, ikki bosqichli autentifikatsiyadan foydalanish, noma’lum manbalardan kelgan xabar va havolalarni ochmaslik, shaxsiy ma’lumotlarni begona shaxslarga oshkor etmaslik hamda mobil qurilmalar va kompyuterlarda axborot xavfsizligi talablariga rioya qilish bo‘yicha tavsiyalar berildi.
Targ‘ibot tadbiri davomida talaba-yoshlar bilan kibermadaniyat va kibergigiyena qoidalarining kundalik hayotdagi ahamiyati, internetdan mas’uliyat bilan foydalanish, kiberfiribgarlik holatlariga duch kelganda to‘g‘ri harakat qilish hamda raqamli muhitda hushyorlikni oshirish masalalari yuzasidan fikr almashildi.
Mazkur tadbir talaba-yoshlarning axborot xavfsizligi bo‘yicha savodxonligini oshirish, ularning turli kibertahdidlarga nisbatan ogohligini kuchaytirish, kiberjinoyatlarning oldini olish hamda xavfsiz raqamli muhitni shakllantirishga xizmat qiladi.
Buxoro davlat universitetida “Kibermadaniyatni yuksaltirish va kibergigiyenani shakllantirish oyligi” doirasida professor-o‘qituvchilar, ishchi-xodimlar va talaba-yoshlar o‘rtasida axborot xavfsizligi madaniyatini yuksaltirishga qaratilgan targ‘ibot-tushuntirish tadbirlari izchil davom ettirilmoqda.
UZ