06.11.2026

Buxoro davlat universitetining Axborot texnologiyalari bo‘yicha rektor maslahatchisi H.I. Eshankulov, Raqamli ta’lim texnologiyalari departamenti boshlig‘i M.Z. Xusenov, shuningdek, “Amaliy matematika va dasturlash texnologiyalari” hamda “Sun’iy intellekt va axborot xavfsizligi” kafedralari professor-o‘qituvchilari “Besh million sun’iy intellekt yetakchilari” loyihasi doirasida tashkil etilgan milliy tanlov va kiberxavfsizlik masalalariga bag‘ishlangan konferensiyada ishtirok etdi.

Mazkur tadbirlar sun’iy intellekt texnologiyalarini rivojlantirish, raqamli transformatsiya jarayonlarini jadallashtirish, yoshlarning zamonaviy axborot texnologiyalari sohasidagi bilim va ko‘nikmalarini oshirish hamda kiberxavfsizlik madaniyatini shakllantirish nuqtayi nazaridan muhim ahamiyat kasb etadi.

“Besh million sun’iy intellekt yetakchilari” loyihasi doirasida tashkil etilgan milliy tanlov yoshlarning sun’iy intellekt sohasiga bo‘lgan qiziqishini kuchaytirish, ularning innovatsion g‘oyalarini qo‘llab-quvvatlash, zamonaviy texnologiyalardan samarali foydalanish ko‘nikmalarini rivojlantirish hamda sun’iy intellekt bo‘yicha salohiyatli kadrlarni tayyorlashga qaratilgan.

Universitet vakillarining ushbu tanlovdagi ishtiroki oliy ta’lim muassasasida sun’iy intellekt texnologiyalarini ta’lim jarayoniga keng joriy etish, talabalarning amaliy va ilmiy-tadqiqot faoliyatini rivojlantirish hamda innovatsion loyihalarda faol qatnashishini rag‘batlantirish borasidagi ustuvor vazifalar bilan uzviy bog‘liqdir.

Shuningdek, kiberxavfsizlik masalalariga bag‘ishlangan konferensiya doirasida axborot tizimlari va resurslarini himoyalash, zamonaviy kibertahdidlarning oldini olish, shaxsga doir ma’lumotlar xavfsizligini ta’minlash, raqamli infratuzilmaning barqaror ishlashini qo‘llab-quvvatlash hamda jamiyatda kibermadaniyat va kibergigiyena ko‘nikmalarini shakllantirish kabi dolzarb masalalar muhokama qilindi.

Mazkur yo‘nalishlar Buxoro davlat universitetida amalga oshirilayotgan raqamlashtirish jarayonlari, ta’lim va boshqaruv tizimlariga zamonaviy axborot texnologiyalarini tatbiq etish hamda universitetning axborot xavfsizligini mustahkamlashga qaratilgan faoliyat bilan bevosita bog‘liq.

Universitet vakillarining milliy tanlov va konferensiyadagi ishtiroki sun’iy intellekt va kiberxavfsizlik sohalaridagi ilg‘or tajribalarni o‘rganish, ilmiy-amaliy hamkorlikni rivojlantirish hamda zamonaviy texnologik yondashuvlarni universitet faoliyatiga tatbiq etish uchun muhim imkoniyat yaratadi.

Buxoro davlat universitetida sun’iy intellekt texnologiyalarini rivojlantirish, raqamli ta’lim imkoniyatlarini kengaytirish, axborot xavfsizligini ta’minlash hamda yuqori malakali mutaxassislarni tayyorlashga qaratilgan tizimli ishlar izchil davom ettirilmoqda.