09.10.2026

Buxoro davlat universitetida xodimlar hamda talaba-yoshlarning internet tarmog‘i va mobil qurilmalardan xavfsiz foydalanish madaniyatini oshirish, axborot xavfsizligi va kibergigiyena qoidalariga rioya etishini ta’minlash, shuningdek, sun’iy intellekt texnologiyalaridan oqilona va mas’uliyat bilan foydalanish ko‘nikmalarini shakllantirish maqsadida targ‘ibot-tushuntirish tadbirlari tashkil etildi.

Mazkur tadbirlar davomida universitet xodimlari va talaba-yoshlarga internet tarmog‘ida uchraydigan kiberxavflar, shaxsiy ma’lumotlarni himoya qilish, kuchli parollardan foydalanish, ikki bosqichli autentifikatsiyani yo‘lga qo‘yish, shubhali havolalar va noma’lum fayllardan ehtiyot bo‘lish, mobil qurilmalarga ishonchsiz ilovalarni o‘rnatmaslik hamda ijtimoiy tarmoqlardagi firibgarlik holatlarining oldini olish bo‘yicha tushunchalar berildi.

Shuningdek, kiberjinoyatchilikning keng tarqalgan turlari, jumladan, fishing hujumlari, zararli APK fayllar, soxta internet sahifalari, messenjerlar orqali tarqatiladigan firibgarlik xabarlari, bank kartalari ma’lumotlarini qo‘lga kiritishga qaratilgan urinishlar hamda “dropperlik” faoliyatining huquqiy oqibatlari yuzasidan tushuntirish ishlari olib borildi.

Tadbirlar doirasida sun’iy intellekt texnologiyalaridan ta’lim, ilmiy tadqiqot va kundalik faoliyatda samarali foydalanish masalalariga ham alohida e’tibor qaratildi. Xususan, sun’iy intellekt yordamida yaratilgan ma’lumotlarning ishonchliligini tekshirish, akademik halollik tamoyillariga amal qilish, mualliflik huquqlarini hurmat qilish, shaxsiy va xizmat ma’lumotlarini sun’iy intellekt platformalariga kiritishda ehtiyotkorlik choralarini ko‘rish bo‘yicha tavsiyalar berildi.

Bundan tashqari, universitetda axborot xavfsizligi madaniyatini yanada mustahkamlash maqsadida “Kiberxavfsizlik oyligi” va “Raqamli gigiyena soati” kabi targ‘ibot yo‘nalishlarining ahamiyati tushuntirilib, internet va raqamli texnologiyalardan foydalanishda har bir foydalanuvchining shaxsiy mas’uliyatini oshirish zarurligi ta’kidlandi.

Ushbu tadbirlar universitet jamoasining raqamli savodxonligini oshirish, kiberxavflarga qarshi immunitetini shakllantirish, xavfsiz axborot muhitini yaratish hamda sun’iy intellekt texnologiyalaridan samarali, xavfsiz va mas’uliyatli foydalanish madaniyatini rivojlantirishga xizmat qiladi.