28.08.2026

Buxoro davlat universiteti Fizika-matematika va axborot texnologiyalari fakulteti jamoasi ishtirokida Buxoro viloyati Ichki ishlar boshqarmasi Kiberjinoyatlarga qarshi kurashish boshqarmasi xodimlari bilan hamkorlikda “Buxoro Smart Qalqon” mobil ilovasining taqdimoti bo‘lib o‘tdi.

Tadbir davomida bugungi kunda raqamli texnologiyalar va internet tarmog‘idan foydalanish jarayonida yuzaga kelayotgan kiberxavflar, zararli dasturlar, soxta havolalar hamda turli xil firibgarliklardan himoyalanishning zamonaviy usullari haqida batafsil ma’lumot berildi.

Taqdimot davomida “Buxoro Smart Qalqon” mobil ilovasining imkoniyatlari amaliy tarzda namoyish etildi. Jumladan, ilova orqali zararli va xavf tug‘dirishi mumkin bo‘lgan APK fayllarni aniqlash va bloklash, xavfli hamda taqiqlangan internet-resurslarga kirishni cheklash, shuningdek, foydalanuvchilarni turli kiberxavflardan ogohlantirish imkoniyatlari haqida tushuntirishlar berildi.

Shuningdek, ishtirokchilarga mobil qurilmalarga dastur va fayllarni faqat ishonchli hamda rasmiy manbalardan yuklab olish, noma’lum manbalardan yuborilgan APK fayllarni o‘rnatmaslik, shubhali havolalarga kirmaslik va shaxsiy ma’lumotlarni himoya qilish bo‘yicha tavsiyalar berildi.

Tadbir yakunida fakultet jamoasi vakillari tomonidan “Buxoro Smart Qalqon” ilovasidan foydalanish, uning imkoniyatlarini ta’lim jarayonida keng targ‘ib qilish hamda talaba-yoshlar o‘rtasida kiberxavfsizlik va raqamli madaniyatni oshirishga qaratilgan profilaktik-targ‘ibot ishlarini kuchaytirish yuzasidan fikr va takliflar bildirildi.

Mazkur tadbir yoshlar va pedagog-xodimlarning kiberxavfsizlik borasidagi bilim va ko‘nikmalarini oshirish, zamonaviy kiberxavflardan himoyalanish madaniyatini shakllantirish hamda raqamli muhitda xavfsiz faoliyat yuritish ko‘nikmalarini rivojlantirishda muhim ahamiyat kasb etdi.