Ona yurtimiz uchun sog`lom va barkamol avlodni voyaga etkazish, ta`lim-tarbiya sohasini rivojlantirish, o`g`il-qizlar qalbida yuksak ma`naviy-axloqiy fazilatlarni shakllantirish, ularni vatanparvarlik, istiqlol g`oyalariga sadoqat ruhida tarbiyalashga salmoqli hissa qo`shayotgan zahmatkash ustoz-murabbiylarni viloyatimizning barcha tumanlarida uchratish mumkin.
Vohamizning eng chekka hududi bo`lmish Qorovulbozor tumanidagi sanoat va transport kasb-hunar kollejida o`quvchilarga biologiya fanidan ta`lim berib, o`zining mashaqqatli mehnati ortidan qator yutuqlarga erishayotgan Shoira Sodiqova ham ana shunday fidoyi pedagoglardan biridir.
U 1987 yilda Buxoro davlat pedagogika institutini tamomlab, 1992 yilda G`ijduvon tumanidagi 30-maktabda o`qituvchilik faoliyatini boshladi. 1998 yilda Qorovulbozor tumanidagi 1-maktabda, 2002 yildan hozirgi kunga qadar tumandagi sanoat va transport kasb-hunar kollejida ishlab kelmoqda. Faoliyati davomida uning o`quvchilari tuman va viloyat ko`rik tanlovlarida, fan olimpiadalarida faxrli o`rinlarni egallaganlar. Biologiya fanidan 10 dan ortiq uslubiy qo`llanmalarni ishlab chiqib, ularni "Iste`dod" nash¬riyotida chop ettirdi. ekologik harakat faollari bilan doimiy hamkorlikda "Ona tabiatni asrash va himoyalash" tadbirlarini tashkil etib kelmoqda. Bir qator o`quvchilari hozirda oliy o`quv yurtlarini tamomlab, ustozining izidan bormoqdalar.
—17 yillik kamtarona mehnatlarim inobatga olinib, 2009 yilda "Mehnat shuhrati" ordeni bilan mukofotlandim. Bu orden meni ta`lim-tarbiya jarayonida faol ishtirok etishga, biologiya fanini o`quvchilarga etkazishda innovatsion usullarni joriy etishga, o`z ustimda astoydil ishlashga undadi,—deydi biz bilan suhbatda Shoira Sodiqova.
Bugun 54 yoshni qoralab, nafaqaga chiqish arafasida turgan Shoira opa umrining 25 yilini o`qituvchilikdek mashaqqatli va zahmatli kasbga bag`ishlaganidan faxrlanadi. U "Imkonim bo`lsa, davlatimizning ko`ksimga taqqan ordenini oqlash uchun yana 25 yil yosh avlod ta`lim-tarbiyasi bilan shug`ullanardim", deydi tabassum bilan. Uning ko`zlaridagi quvonch, qalbidagi o`z kasbiga bo`lgan muhabbat va shijoat, ertangi kunga ishonch, o`quvchilar kamoloti uchun javobgarlik hissi, bugun o`qituvchilikni havas qilib izlanayotgan yoshlar uchun ibrat bo`lishga arzigulikdir.
Manba: buxoronoma.uz
