30.10.2026

Buxoro davlat universitetida pedagog kadrlar lavozimlari bo‘yicha vakant ish o‘rinlariga e’lon qilingan ochiq tanlovda ishtirok etgan nomzodlar uchun seminar-trening mashg‘ulotlari tashkil etildi.

Mazkur o‘quv mashg‘ulotlari ishtirokchilarning kasbiy bilim va ko‘nikmalarini mustahkamlash, ta’lim jarayonida zamonaviy yondashuvlarni qo‘llash hamda pedagogik faoliyatda halollik, shaffoflik va mas’uliyat tamoyillariga rioya etish madaniyatini yuksaltirishga qaratildi.

Seminar-trening doirasida “Korrupsiyaga qarshi kurashish sohasida ichki nazorat — «Komplaens-nazorat» tizimi”, “Ta’limda kredit-modul tizimi” hamda “Pedagog kasbiy kompetentligi” mavzularida o‘quv mashg‘ulotlari olib borildi.

Treningning dastlabki kunida korrupsiyaga qarshi kurashishning huquqiy asoslari, ichki nazorat tizimining maqsad va vazifalari, korrupsiyaviy xavf-xatarlarning oldini olish mexanizmlari hamda ta’lim muassasasida ochiqlik va shaffoflikni ta’minlash masalalariga alohida e’tibor qaratildi.

Shuningdek, kredit-modul tizimining o‘ziga xos jihatlari, o‘quv jarayonini samarali tashkil etish, talabalarning faolligini oshirish, ta’lim oluvchiga yo‘naltirilgan yondashuvlarni qo‘llash hamda pedagogning kasbiy kompetentligini rivojlantirishga doir muhim masalalar muhokama qilindi.

Mashg‘ulotlar interfaol usullar asosida tashkil etilib, tinglovchilar mavzular yuzasidan fikr almashdilar, amaliy vaziyatlarni tahlil qildilar hamda o‘zlarini qiziqtirgan savollarga javob oldilar.

Ushbu seminar-trening universitetda malakali pedagog kadrlar salohiyatini oshirish, ta’lim sifatini yanada yaxshilash hamda akademik halollik va kasbiy mas’uliyat tamoyillarini mustahkamlashga xizmat qiladi.