27.04.2026

Tong otguncha

Nur tomgan yuzingga to'yib tikilib,
Surating yurakka joyladim ona.
Qabr toshing uzra boshimni qo'yib,
Tuproq bo'lgan ta'ning yoqladim ona.
Bedor kechalarda mehringni qo'msab,
Bugun tong otguncha yig'ladim yana.

Qaniydi erkalab, popugim desang
Kechardim eng shirin totli so'zlardan.
Betob holingda ham g'amni to'sarding.
Bolam deb asrarding yomon ko'zlardan.
Bedor kechalarda mehringni qo'msab,
Bugun  tong otguncha yig'ladim yana.

Davo topilmadi xasta taningga
Tobora so'narding kun o'tgan sayin.
Ichingni kemirib borardi dardlar
Hayot zarbalari o'rtagan sayin.
Bedor kechalarda mehringni qo'msab,
Bugun tong otguncha yig'ladim yana.

Malham bo'lolmadim senga onajon
Uzilgan gul misol qurib qolganding.
Yo'limga termulib o'tdiku kuning
Yetib kelganimda so'lib  bo'lganding.
Bedor kechalarda mehringni qo'msab
Bugun tong otguncha yig'ladim yana.

Vaqtida qadrlang mushfiq onangiz
Tuproqqa aylansa topa olmaysiz.
Sog'inchdan egilsa mag'rur boshingiz
Hech kimni volidam deya olmaysiz.
Bedor kechalarda mehringni qo'msab,
Bugun tong otguncha yig'ladim yana

Muhammadova Zarifa.
Filologiya fakulteti 6-1-jur 24guruhi talabasi