14.04.2026

Onajon siz mening nur-u diydamsiz,

Sevinchim, borligʻim butun hayotim

Dard cheksam yonimda har dam boʻlasiz,

Mening muhabbatim,sinmas qanotim

Men sheʼrga solaman butun mehrimni

Ammo bu ham kamlik qiladi sizga

Qalam ham ojizdir, qoʻlim ham ojiz

Agar soʻz boshlasam taʼrifingizga.

Onajon, ayting siz borim berayin,

Dunyo matohlarin bir-bir terayin.

Siz ayting, mahsharda savobim beray,

Mungli koʻzlaringiz quvonchga toʻlgay.

Onajon, doimo sogʻ-omon boʻling

Baxtli kunlarimda yonimda turing

Bobojonimdan siz yodgorim onam

Qalbimning gavhari sizsiz yakdonam

Siz emasmi, menga hayotni bagʻishlab,

Mening jonim uchun jonini bergan.

Yutuqqa erishsam gullarni tutgan,

Magʻlub boʻlganimda yelkadosh boʻlgan.

Agar yozaversam, bir doston boʻlgay,

Onalar duosi, derlar ijobat

Shu duo tufayli baxtimiz kulgay

Men uchun hamisha sogʻ boʻling faqat

Mening bu dunyoda suyanganimsiz

Qalbi qorday oppoq, tiniq, begʻubor.

Sizsiz bu olam ham qorongʻu menga

Qora sochingizga qoʻnmasin gʻubor

Siz uchun sheʼr yozmoq men uchun sharaf

Bunday inoyatni uzoq kutganman.

Durdonadir har bir aytgan soʻzingiz

Yuragimga shu hikmatni bitganman.

Asalbonu Tolibova,

BuxDU Filologiya fakulteti 1-bosqich talabasi