#Talabalar_ijodidan
#Tabiiy_Fanlar
Hayot zavqi
Har bitta insonning orzulari bor,
Orzular ostida hayollar bisyor,
Yoqimli tuyg'ular qilmaydi bezor,
Balkim hayot zavqi shu bo'lsa kerak.
Dunyoga boqamiz hayratlar bilan,
O'tmishni eslaymiz hasratlar bilan,
Yurakda saqlaymiz hurmatlar bilan,
Balkim hayot zavqi shu bo'lsa kerak.
Vaqt bilan hamnafas birga chopamiz,
Ba'zida qadirdon do'stlar topamiz,
Quvonib armonga eshik yopamiz,
Balkim hayot zavqi shu bo'lsa kerak.
Kimdir yashab o'tar hayotda izsiz,
Tarixda qoladi kimlardir so'zsiz,
Kamayib qolmaydi bu dunyo bizsiz,
Balkim hayot zavqi shu bo'lsa kerak.
Taqdir yo'llar har tong turli sovg'alar,
Ba'zida yaxshilik ba'zan g'avg'olar,
Chandiqlarni vaqtning o'zi davolar,
Balkim hayot zavqi shu bo'lsa kerak.
Duolar qilamiz Xudodan so'rab,
Ishonch va umidni poklikka o'rab,
Qudratinga shubha bo'lmagay Yo Rab,
Balkim hayot zavqi shu bo'lsa kerak.
Birovning holini bilmaydi birov,
Har kimga har xilda berilgan sinov,
Mening javobim shu berilsa so'rov,
Balkim hayot zavqi shu bo'lsa kerak.
Bir kuni yig'laymiz bir kun kulamiz,
Gohida ketamiz goho kelamiz,
Ajal yetsa bir kun biz ham o'lamiz,
Balkim hayot zavqi shu bo'lsa kerak.
To'rt kunlik hayotning gashtini surib,
Kim qoldi kim ketdi yuzini burib,
Boramiz umrning yo'lidan yurib,
Balkim hayot zavqi shu bo'lsa kerak.
✍️ ALIJON YO'LDOSHEV Tabiiy Fanlar Fakulteti 2-1EkoKT-22 Talabasi
