11 dekabr kuni Toshkent shahridagi Plaza art-markazida “Yevropa Ittifoqining ta’lim ko’rgazmasi” ish boshladi. Unda Erazmus+ stipendiya dasturi hamda Yevropa Ittifoqiga a’zo davlatlari grant dasturlari, shuningdek, Yevropa universitetlari bilan O’zbekiston oliy o’quv yurtlari o’rtasidagi ilmiy hamkorlik loyihalari ham namoyish etiladi.
Ko’rgazma doirasida Erazmus Mundus dasturi bitiruvchilarining Yevropada o’qish va tanlov jarayonidagi muvaffaqiyat strategiyalari bo’yicha taqdimotlari, ta’sirchan rezyume va asoslovchi xat yozish bo’yicha treninglar o’tkaziladi. Ko’rgazma davomida tashrif buyuruvchilar o’rtasida lotereya o’yini o’tkazilib, g’oliblarga Yevropa Ittifoqi tomonidan yutuqlar topshiriladi.
Ma’lumot uchun, Yevropa Ittifoqining ta’lim, kasbiy o’qitish, yoshlar va sport rivojini qo’llovchi Erazmus+ dasturi doirasida Yevropa ning 33 mamlakati va dunyoning barcha mintaqalaridagi 125000 tashkilot va 4 million kishini qamrab oluvchi ta’lim dasturlari va grantlarni moliyalash uchun 2014-2020 yillar davomida umumiy hajmi 14 milliard evrolik byudjet rejalangan.
Erazmus+ dasturining ilk tanlovi natijalari respublika oliy o’quv yurtlarida yangi dasturda qatnashish uchun katta qiziqish borligini yana bir bor tasdiqladi, shuningdek, Markaziy Osiyo mintaqasi uchun loyihalar tanlash jarayonidagi statistika ko’rsatkichlarining yaxshilanishi ham shundan darak bermoqda. Markaziy Osiyo bo’yicha 23 ta loyiha tanlab olingan va shulardan 12tasida O’zbekiston oliy o’quv yurtlari ishtirok etadi.
Toshkentdan 13ta va 8 viloyatdan 14ta, jami O’zbekistonning 27ta oliy o’quv yurtidagi loyiha guruhlari Evropa Ittifoqining 14 a’zo davlatidagi 42ta universitetlari hamkorligidagi 8 mintaqaviy va 4 milliy loyihalarga jalb etiladi.
Plaza art-markazi (Amir Temur prospekti, 107, Bodomzor metro stansiyasi)da bo’lib o’tayotgan ko’rgazmada qatnashishni istaganlar yonida, xavfsizlik nuqtai nazaridan, shaxsini tasdiqlovchi hujjatlar bo’lishi lozim.
