Universitetimizda oliy ta'limni rivojlantirishga qaratilgan "Oliy ta'lim tizimini yanada rivojlantirish to'g'risida" PQ-2909-sonli hamda "Oliy ta'lim muassasalarida ta'lim sifatini oshirish va ularning mamlakatda amalga oshirilayotgan keng qamrovli islohotlarda faol ishtirokini ta'minlash bo'yicha qo'shimcha chora-tadbirlar to'g'risida" PQ-3775-sonli Prezident qarorlarida belgilab berilgan vazifalar ijrosi bo'yicha qator ishlar amalga oshirilmoqda.
Joriy yilning iyun oyida BuxDU delegatsiyasi (prorektor O.H. Raximov, Ta'lim sifatini nazorat qilish bo'limi boshlig'i D.Sh.Yavmutov, Turizm fakulteti dekani A.T.Jo'rayev, "Psixologiya" kafedrasi mudiri Sh.R.Barotov) Ispaniya hamda Turkiyadagi bir qator hamkor universitetlarda xizmat safarida bo'lib qaytdi.
Turizm fakulteti dekani A.T.Jo'rayev Ispaniyaning Alikante hamda Valensiya politexnika universitetlariga safari chog'ida ushbu universitetlarning faoliyati bilan tanishdi, rahbariyat bilan uchrashuvlar o'tkazib mamlakatimizda oliy ta'lim tizimida olib borilayotgan islohotlar bilan tanishtirdi. Alikante universitetining texnoparkiga, Valensiya politexnika universiteti huzuridagi "Innovatsiya shaharchasi"ga, “Karyera markazi”ga tashriflar paytida ushbu yo'nalishdagi tajribalar o'rganildi.
Alikante universiteti Ispaniyaning yetakchi OTMlaridan biri bo'lib, 1979-yilda tashkil qilingan. TIMESning yosh universitetlar jahon reytingida yuqori 250 taligiga kiradi. Talabalar soni 32 mingdan ortiq. Universitetning qudratli ilmiy-tadqiqot bazasi mavjud. Har yili 1200 nafarga yaqin xorijlik talaba o'qishga qabul qilinadi. Veb-sayt: www.ua.es
Valensiya politexnika universiteti 1971-yilda tashkil qilingan bo'lib, Ispaniyaning yuqori 10 talik, TIMES yosh universitetlar jahon reytingida yuqori 150 talik, umuiy reytingda yuqori 500 talikda turadi. Talabalar soni 40 mingga yaqin. Veb-sayt: www.upv.es
Har ikkala universitet bilan o'zaro hamkorlik shartnomasi asosida hamkorlikni rivojlantirishga qaratilgan "Yo'l xaritasi" tayyorlandi. 2018-2019 o'quv yilida Valensiya politexnika universitetidan 2 nafar professorning BuxDUga, BuxDUdan VPUga esa 4 nafar tadqiqotchining safarlarini tashkil qilishga kelishildi.
BuxDU delegatsiyasi 8-9 iyun kunlari Turkiyaning Karabyuk universiteti faoliyati bilan tanishdi.
Karabyuk universiteti davlat oliy ta'lim muassasasi bo'lib, 2007 yilda tashkil etilgan. Turkiyaning yetakchi OTMlari qatorida turadi. Shiori: Zamonaviy ta'lim maskani. Ta'lim tillari: turkcha, inglizcha. Talaba soni: 32 ming. Akademik bo'linmalar: 16 ta fakultet, 5 ta oliy maktab, 4 ta ilmiy tadqiqot instituti, 8 ta kasb-hunar maktabi, 8 ta ilmiy markaz. Universitet fakultetlarida ta'lim yo'nalishlarining kamida 30 %, ba'zi fakultetlarda esa ta'lim yo'nalishlarining 100 %da ta'lim ingliz tilida berilmoqda. Ingliz tilida o'qishni xohlovchilar uchun 1 yillik ingliz tili tayyorlov kurslari tashkil qilingan. Ingliz tilidagi ta'limning yuqori saviyada ekanligiga asoslangan holda, Karabyuk universiteti Yevropa Komissiyasi tomonidan ingliz tilida diplom ilovasi (ECTS Diploma Appendix) berish huquqini qo'lga kiritgan. 40 dan ortiq ta'lim yo'nalishida masofadan ta'lim beriladi. 35 ta talaba klublari faoliyat ko'rsatadi. Veb-sayt: www.karabuk.edu.tr
BuxDU va Karabyuk universiteti hamkorligida 2018 yilning oktyabr oyida Karabyukda “1-xalqaro turizm, madaniyat va arxitektura konferentsiyasi”ni o'tkazish masalalari muhokama qilindi. Konferentsiyada jahonning turli mamlakatlaridan tashrif buyuradigan olimlar ishtirokida ilmiy munozaralar o'tkazish bilan bir qatorda O'zbekistonning turizm salohiyatini namoyish qilish ham rejalashtirilgan. Shuningdek, Karabyuk viloyatidagi YuNESKO jahon merosi ro'yxatiga kiritilgan Safranbolu shahri bilan ayni maqomga ega bo'lgan Buxoro shahri o'rtasida qardoshlik aloqalarini o'rnatish bo'yicha kelishib olindi. Universitetda ilmiy faoliyatning tashkil qilinishi, ta'lim sifatini ta'minlash chora-tadbirlari, moliyaviy faoliyatning qanday olib borilishi bilan tanishildi.
Delegatsiya 9-13 iyun kunlari Anqara shahrida bo'lib, Gazi universiteti va Yildirim Boyazid universiteti faoliyati bilan tanishildi.
Gazi universiteti 1926-yilda tashkil qilingan. O'qitish sifati bo'yicha Turkiyada yuqori 5 talikka, URAP va LEIDEN jahon reytinglarida yuqori 500 talikka, meditsina va muhandislik sohasida jahonda yuqori 300 talikka kiradi, muhandislik sohasida Turkiyaning eng yaxshi 3-universiteti. Tarkibida 25 tadan ortiq fakultet va institutlar, 52 ta ilmiy markaz mavjud, talabalar soni 80 mingdan ortiq. Universitet kutubxonasi 700 nomdagi xalqaro hamda 600 nomdagi mahalliy ilmiy jurnallarga obuna bo'lgan. 20 mingdan ortiq onlayn ilmiy jurnal hamda 30 dan ortiq onlayn ma'lumot bazalariga ulanish imkoniyati yaratilgan. Veb-sayt: www.gazi.edu.tr
Anqara Yildirim Boyazid universiteti 2010-yilda tashkil qilingan bo'lib, talabalar soni 14 mingni tashkil etadi. 8 ta kampusda joylashgan bo'lib, tarkibiga 12 ta fakultet, 15 ta ilmiy markaz kiradi. Talabalarning 10 % qismi xorijliklardir. Universitet o'zini xalqaro ilmiy tadqiqot universiteti sifatida taqdim qiladi. Talabalarning 30 %i magistratura va doktoranturada tahsil olishadi. Tibbiyot, muhandislik va tabiiy fanlar, siyosiy fanlar, psixologiya va boshqa bir qator ijtimoiy fanlar sohasida ta'lim 100 % ingliz tilida olib boriladi. Huquq fakultetida ta'limning 30 %i ingliz tilida olib borilib, bu ko'rsatkich bo'yicha Turkiyadagi davlat universitetlari orasida birinchi o'rinni egallaydi. Ta'lim dasturlarining aksariyati OXFORD, TOEFL, PEARSON, CITY & GUILD kabi nufuzli muassasalar akkreditatsiyasini olgan. Universitet Turkiya abiturientlari o'rtasida eng ko'p tanlangan yuqori 5 talikka kiradi. Har bir bitiruvchi kamida 1 ta xorijiy tilni mukammal egallashi talabi joriy qilingan. Veb-sayt: www.ybu.edu.tr
Har ikkala universitet bilan o'zaro hamkorlikni rivojlantirishga qaratilgan "yo'l xaritasi" tayyorlash va hamkorlik shartnomasi imzolashga kelishildi. Ushbu universitetlar yetakchiligida 2018 yilning 23-26 oktyabr kunlari Buxoro shahrida 30 dan ortiq mamlakatdan tashrif buyuradigan 350 nafarga yaqin olimlar ishtirokida “3-xalqaro ijtimoiy fanlar kongressi”ni tashkil qilish masalalari muhokama qilindi.
BuxDUda nashr qilinayotgan hamda OAK tomonidan bir qator ixtisosliklar uchun ilmiy maqolalarni nashr qilish uchun tavsiya qilingan “Psixologiya” ilmiy jurnali ishida hamkorlik qilishga, shu jumladan, mazkur jurnalni o'zaro kelishuv asosida xalqaro onlayn bazalarga kiritish hamda impakt-faktorni oshirish borasida kelishib olindi. Shuningdek, mazkur universitetlarda ilmiy faoliyatning tashkil qilinishi, ta'lim sifatini ta'minlash chora-tadbirlari, moliyaviy faoliyatning qanday olib borilishi bilan tanishildi. Gazi universitetining texnoparki hamda Turizm fakulteti amaliyot kompleksi faoliyati o'rganildi. Hamkor universitetlar tomonidan BuxDUga professor-o'qituvchilarni ma'ruzalar o'qish uchun uzatish, BuxDUdan doktorantlarni qabul qilish bo'yicha kelishildi.
BuxDU delegatsiyasi O'zbekistonning Turkiyadagi elchixonasi tomonidan ham qabul qilindi. Elchixona tomonidan O'zbekiston OTMlarining Turkiya OTMlari bilan hamkorlik qilishlari uchun barcha yordam ko'rsatilishi ta'kidlab o'tildi.
Buxoro davlat universiteti xalqaro hamkorlikni kengaytirib borish orqali ta'lim sifatini oshirish ishlarini jadallashtirishga alohida e'tibor qaratishga davom etadi.
