Qadrli o‘qituvchi va murabbiylar!
Barchangizni Buxoro davlat universiteti nomidan umumxalq bayrami 1-oktabr – O‘qituvchilar va murabbiylar kuni bilan chin qalbdan tabriklaymiz. Har birimiz uchun eng aziz va eng qadrli bo‘lgan farzandlarimizga ta‘lim va tarbiyaga, kelajakka aniq yo‘naltirishdek ulkan va xayrli ishga o‘zining hayotini bag‘ishlagan o‘qituvchi va murabbiylarning xizmatlari oldida har qancha ta‘zim qilsak arziydi.
Barcha sohalarda shiddat bilan rivojlanayotgan O‘zbekistonimizning keyingi taraqqiyoti aynan ta’lim tizimiga, xususan oliy ta’lim muassasalari yetishtirayotgan kadrlar sifatiga bog‘liq. Bu borada Buxoro davlat universitetida ham islohotlarga hamohang tarzda amaliy ishlar olib borilmoqda va qator yutuqlarga erishilmoqda. So‘nggi yillarda Buxoro davlat universiteti jamoasi erishayotgan barcha yutuqlar zamirida ham professor-o‘qituvchilarimizning mehnati, zaxmati mujassam. Siz aziz Ustozlarimizning yoshlarimiz qalbi va ongiga ona Vatanga muhabbat va sadoqat tuyg‘usini singdirish, ularni turli tahdidlardan asrash, komil inson etib voyaga yetkazish yo‘lidagi xizmatlaringiz beqiyosdir.
Aziz o‘qituvchi va murabbiylar! Sizlarni 1-oktabr–O‘qituvchilar va murabbiylar kuni umumxalq bayrami bilan yana bir marta qizg‘in qutlab, barchangizga mustahkam sog‘lik, oilalaringizga omonlik, yurtimiz kelajagini belgilaydigan yoshlarni tarbiyalashdek xayrli ishlaringizda muvaffaqiyatlar tilaymiz!
